情陷夜中環：狂迷8882
■自中學開始，筆者與不少身邊朋友已經視沈嘉偉為偶像。
獅子山下的故事，從葉朗程口中說出來，說服力是零。從事金融的，尤其是做私人銀行的，與獅子山下的精神很有距離。講得難聽啲，如果營營役役十年，再勞勞碌碌十年，搏一個捱出頭來的機會，就是獅子山精神的話，中環人真係睬你都儍。
中環人食lunch要食兩個鐘，中環人要嘆住世界來上位，中環人是機會主義者。中環人的世界，「捱」等於「蠢」。After all，獅子山的位置是沙田，不是中環。那當然，冰山總有一角，某些中環人也是捱出一番成就的。以前有個年輕人是某富豪的禦用球僮，即是人哋烈日當空下打golf，佢就負責孭袋擔遮。今天，他是美資投行的收購合併部揸fit人。名無謂開，很多行家都會知我講緊邊個。
衷心敬佩每一個獅子山下的故事，但葉朗程心目中的獅子山精神，與其他人的定義有分別。李嘉誠先生是中環人的偶像，但他不能代表獅子山精神，因為誠哥不是土生土長的香港人，而且他的年代太遙遠。
獅子山故事要有香港仔味道
簡單嚟講，我同誠哥connect唔到，佢有少少似關二哥，可以用來朝拜，但不可以做借鏡。每個所謂獅子山下的故事，說出來都會有種「行神蹟」的感覺，但神蹟得嚟，應該要有濃厚的「香港仔」味道。誠哥行的神蹟，太過匪夷所思，沒有香港仔味道。
很多人心目中的獅子山下故事，需要兩個元素。第一，起步要夠「窮」；第二，之後要飛黃騰達，要飛得好高好高。講多一個似是而非的獅子山下故事，是黃仁龍。百分百可敬的黃仁龍，有齊呢兩個元素，出身夠窮，飛得夠高。但黃仁龍不符合我心目中一個主觀條件：讀書「渣」。
一個浪漫的獅子山故事，其主角讀書不能太叻，因為讀書太叻嘅話，again，好多香港人都connect唔到。唔記得黃仁龍exactly係乜嘢成績，但總之就好多個「優」。攞獎學金去英國劍橋讀law跟住做埋大律師，你叫普羅香港人點connect？黃仁龍係天才，唔係典型香港仔。獅子山下，就是人人都可以有共鳴，十優狀元讓人沒有共鳴。
還有還有，黃仁龍還有一點是不夠「獅子山」的，係佢個樣。皮膚滑到見唔到毛孔，冇鬚根，個樣太正氣。WTF，太正氣都唔得？絕對唔得，都係嗰句，太正氣的話，香港人connect唔到，至少我connect唔到。獅子山下的香港仔，多數蘊藏無窮的街頭智慧，而擁有街頭智慧的人，樣子通常都是亦正亦邪的。睇黃仁龍個樣，肯定連鹹碟都未睇過。正氣到咁，唔夠香港仔。
很多年前，在跑馬地喝酒喝到淩晨一點。之後，跟三個朋友走到景光街的7-11，諗住食個杯麵醫肚。步履不穩的走著走著，突然呆一呆，因為我看到一部黑色的平治跑車，正正停在便利店門口。我突然一呆，不是因為我知道這部跑車潛藏著幾多匹馬力，而是因為我知道誰是這部跑車的主人。
中學還未畢業，已經視沈嘉偉為偶像，九成朋友亦然。谷埋谷埋十幾年，要寫沈嘉偉，可以寫兩萬字。由信和廣場殺入港交所，沈生怎樣賺第一桶金，如何在上市前大力擴充，股價為何由一蚊跌到落三毫再爆去八蚊，一路的點點滴滴，講得誇張啲，我可能比邱淑貞更清楚。
一行四人，加快腳步，希望一睹沈生坐在車內的英姿，但原來車內空無一人。我們失望地走入便利店，赫然發覺沈生正站在店內睇雜誌！四個人有默契的各自四散，扮揀薯片，扮攞飲品，至於我，當然站在最佳位置，在沈生旁邊扮睇雜誌。陰功，淩晨一點，沈生還在想著公司的事情，他在看Milk，年輕人必看的時裝雜誌。約15分鐘後，沈生放下雜誌，回到車上，引擎如雷貫耳的響起來，很快就絕塵而去。
I.T起起跌跌沈嘉偉成就傳奇
沈生是個獅子山下的傳奇，其威水史仲厚過當年I.T(999)上市嗰本prospectus。若然要數最為人津津樂道的一個章節，肯定是「強勢回歸」。話說，I.T上市後一段時間，沈生見業務穩定發展，開始退下來，找來專業人士替他管理時裝王國。專業人士大玩財技，揚言要幫公司的股價翻幾翻。最後，I.T真係翻幾翻，不過係「翻船」個「翻」。
業績插水，I.T股價跌到超殘，萬不敢說這是因為「專業人士」管治無方，畢竟人哋學歷仲高過我。盤數見紅，因素很多，怎樣也好，之後專業人士正式退下來，沈生重新執政，之後公司的股價由幾毫子不斷爆上嚟，升咗超過20倍。那時候，I.T在我們銀行「建議買入」的名單之上。
上星期五，我又見到沈生。當年，第一次在便利店遇見沈生，應該是他人生最悠閒得意的時候。今天的沈生，面前是公司成立25年來最嚴峻的考驗。店舖高速擴充、存貨量急升、租金持續高企，加上H&M和Zara等國際品牌大肆侵略，沈生頂得順嗎？
剛在大坑的Sushi Shin跟朋友吃完晚飯，我準備取車，經過越南餐廳火車頭門口之際，就看見沈生正在講電話。雖然生意進入調整期，但我肯定沈生撐得住，今天的他，霸氣猶在。人生只有一個偶像，而偶像就正正站在我面前，霎時間心慌意亂。來回踱步良久，想等沈生講完這通電話，十分鐘後，終於掛線。
死就死，我快步上前：「沈生你好，你係我偶像嚟㗎。」我伸出手，想不到沈生就這樣有誠意的緊緊握著，然後跟我說：「你好你好。」咁唐突，唔好意思。「唔會唔會。」沈生客氣地說。不敢阻偶像太久，我說聲「多謝」，就告一段落。其實，想跟沈生說的，還有很多。
沈生有很多車牌都是有8882四個數字的，大概因為這是Greenpeace(I.T前身)的成立日期：1988年8月2日。我想跟沈生說，因為咁，我都投咗個8882牌。還有一件事，說出來，我驚沈生以為我變態。幾年前，你喺便利店睇完嗰本Milk，我買咗，keep到今日，得閒仲會攞出嚟摸兩嚇。
葉朗程
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
葉朗程
情陷夜中環 - 葉朗程 舊文
