投行怕升市短癮
2014年07月29日
美股回調，但港股借內地A股急升同滬港通傳出開通日期炒上。
港股呢次咁威水，中環茶友事後孔明，話上個星期五見個市係都唔肯跌落去，加上成交增加，大戶睇嚟係想夾上去，整番舖「幾連升」畀淡友歎吓啦，咁樣撞着內地有消息可以借力，仲唔玩舖「大夾夾」咩。
滬深A股再爆發，上證及深成指數各升2.4%及3%，上證指數創今年新高，加上港匯續強，金管局上周末再向市場注資，帶挈港股今早創逾三年半新高，恒生指數一度飆升285點，成交增至854億元，恒指連升五日，累飆1041點，恒生指數全日收報24428點，升212點；國企指數收報11072點，升79點。
藍籌股普遍向上。騰訊(700) 曾創上市高位，高見129.4元，收報128.9元，仍升3.2%，為股市上升主力，向大市貢獻69點升幅；有內地媒體報道，滬港通將於今年10月13日啟動，推動港交所(388) 揚3.4%，造169元，同時帶旺埋證券股造好。
大戶夾倉似賭沙蟹
A股炒上，另一理由係IPO申購暫告一段落，預計「打新」資金將逐步回流資本市場。內地上半年工業利潤增11.4%，同時全國上半年服務業出口按年增18.2%，經濟數據利好，都畀咗炒家一個理由。
最當炒的證券商股、銀行股受惠大漲逾4%外，市場續炒估值低殘的藍籌重磅股、採礦股、煤炭股等藍籌板塊都全線飆升。
茶友話，大戶呢舖好有賭沙蟹feel，家係企業公佈中期業績的日子，以內地上半年增長睇，企業好多盈利都未必達標，公司好消息照計唔多，對個市講隨時會爆地雷炸親人。大家小心翼翼之際，熱錢就推高個市，大力炒上三年新高。
公司前景同股價背馳，一個例子係濠賭股。剛過去兩個月，澳門公佈博彩收益數據，都唔係咁靚仔，照計短期都唔會有乜勁升，但濠賭股由高位調整一段後，股價就企穩。如果用市盈率同未來增長去睇，濠賭股現價仲係唔平，計落唔係咁抵買，但由於有資金頂住，佢亦唔肯調整住，咁嘅情況喺其他板塊都有出現。
茶友形容，雖然現時個市未係炒到七彩，但已經睇到資金主導的情況。
家熱錢流向可以轉得好快，所以就算跟住個市短炒，佢都寧願買番估值唔係咁貴的股票，好似話內房、內銀或保險股呢類，因為佢哋派息有番咁上下，如果有乜閃失捱吓價都仲可以守吓。
另外一個搞好多上市的投行高層話，佢哋安排上市都密密手，有得去就去，老實講對後市唔係睇得咁清，信心唔係咁足，唔知呢啲市況玩得幾耐。佢亦唔係幾信滬港通有好大刺激，佢話限制咗交易金額太細，難有太大推升作用，個市主要跟外圍炒而已。
指數基金炒A股折讓
呢排A股概念當道，除咗幾隻炒折讓股份好似洛鉬(3993) 係咁升，幾隻A股指數基金都好強橫，升勢勁之餘仲有成交配合。安碩A50中國(2823) 報9.51元，升2.5%；南方A50(2822) 漲2.4%，造9.51元；最勁係隻易方達中一百(3100) 彈3.1%。
A股基金咁受歡迎，除睇好內地股市外，仲有個理由係內地A股同本地H股都有差價，香港炒H股股價平過A股的公司，另一招就係炒低水A股的指數基金，好多機構投資者唔買A股，反而走去買內地指數基金，搞到呢類ETF呢排丁財兩旺，個別仲有小小缺貨現象。
陸羽仁
金融High Tea 舊文
