夾高食胡
2014年07月31日
港股真係氣勢如虹，一開市無耐已經直撲兩萬五千點關口，睇真啲，昨日係期指結算日，大戶夾夾味道真係好濃！
個市一開無耐就炒上，跟住好快爆升超過二百點，經紀張打嚟，問個市點解升得咁緊要，我話有個可能係期指結算，大戶殺得性起，再夾高啲都唔奇。睇番去到三點之後，個市就回番落嚟，似乎大戶去到尾段結算計數，已經搞到結算價夠晒高，最後一個鐘慳番啲錢唔夾放手，畀指數自由浮動，咁就回頭。
七日抽高1345點
個市連升七日，七翻身好有夾高食爆棚的嫌疑。咁講唔係話未來個市一定即跌，只係話先前升得咁勁，點都有啲大戶手影。未來大戶唔夾，游自由式，就睇吓外圍帶個市去邊囉。
個市玩大夾夾另一個跡象，係上午明明內地個市唔係持別好，但幾隻重磅國企又扯高，升勢真係嚇你一驚，最多升272點，高見24912點，但到下午就回歸正常，國企指數顯著回調，國企升幅跟住大大收斂。恒生指數收報24732點，升91點，但成交金額去到1001.3億。
呢鋪大戶夾淡友真係夾得幾應，隔夜美股倒跌70點，港股當佢冇到，照樣升到高開，呢個市最特別之處喺七月尾，杜指喺17000點上上落落，唔係咁肯去，但恒指一口氣就升咗1345點，若做淡友在夾倉起步初期無走到，呢鋪都會輸得幾傷。
當指數發力爆上時，個市升得幾搞鬼，其中一樣係借住周永康被立案審查，話咁樣就掃走晒油股不明朗因素，除三桶油炒上外，油田服務股份都照炒上。百勤油服(2178) 飆升10%，華油能源(1251) 抽高7%，海隆(1623) 、安東油服(3337) 都升5%。打老虎打到受影響類別的股價升，都可以算係新聞咯。
有摩笛唱好的本地地產股升勢繼續。今日公佈中期業績的長實(001) 再升3.3元，唔單止跑贏自己友和黃(013) ，仲跑贏其他大型地產股。
過去半年，大型地產股一強一弱好明顯。強者係長實，記得和黃出售屈臣氏股權時，兩間公司都派7元特別息，當時已有講，和黃出售資產派息每股7元，只係收和黃特別息的母公司長江，一樣每股派7元出街，計落好似一號仔着數啲喎。如果當時按照呢個思路換馬，家差不多執多一成錢，可見長實幾強勢！至於和黃有無力追上，就要睇公佈中期業績有無驚喜。由於長和系主席李嘉誠今日不會現身，外界估計唔見超人的業績會平淡啲，會唔會「唔聲唔聲、嚇你一驚」今日就揭盅。
兩大地產股一強一弱
至於弱勢的大型地產股，當然係新世界(017) 啦。今年初佢同信和(083) 都係十元邊浮沉，信和昨日升到13.52元，新世界就造9.7元。就算扣除新世界供股的折讓，兩者都相差近兩成。
新世界咁弱雞好明顯係同佢先前供股有關。新世界年前已經伸過手，今年又再伸手，更弊係佢供股集資係話想私有化新世界中國(917) ，點知計劃最後數人頭竟然數輸咗。
本來佢出價私有化新中價錢唔平，買唔到都無乜所謂，但基金就會奇怪管理層乜唔係有把握先搞集資咁大動作咩，點解咁都甩拖，跟住解釋又含含糊糊，咁你話搞邊科呢？
如果講資產，新世界都有唔少靚嘢，若果講賣樓，集團近年搞多咗項目，都叫做有改善，計起股價同資產折讓，佢仲係大件夾抵食，但就係管理層久不久有神來之筆，市場就大歎難捉摸囉！
陸羽仁
金融High Tea 舊文
