異動空間：同得仕尋寶圖
老牌紡織工業股同得仕(518)昨大棍爆穿今年橫行區，創三年收市新高，成交澎湃近千萬元。無端大手掃上，九成是春江鴨進場，有好消息跟尾，值得跟進！
本月同得仕做?兩單刁，可謂微言大義，即刻分析一下。月初簽訂諒解備忘，出售觀塘同得仕大廈，意向價6億元，市場估值亦逾5億元，當5.5億元成交，已高過昨日全間公司市值(5.4億元)。呢幢樓1988年買入，係同得仕香港總部及主要生產基地，集團仲要同年於聯交所掛牌，可見意義重大。如今連總部都肯賣，日後賣盤機會不低。即使不賣，出售後大派特別息亦相當和味。
根據網頁，公司於1993年購入深圳福田區的同得仕大廈，1997年買入中山地皮起廠，1999年再於中國、泰國及菲律賓設立三間新廠房。單計呢幾項資產，保守計現價已是公司市值數倍，一旦價值釋放，股價應具倍升潛力。
同得仕為清走業務「瘀血」，將虧損番禺業務以2,690萬元賣畀主要股東，剝離上市公司，盤數靚仔?，對日後賣盤更為有利。公司過去三年持續虧損，但隱藏資產卻相當豐厚，不排除日後趁市旺，陸續變賣資產套現，屆時股價將一飛衝天！
魏力
http://www.facebook.com/2012jason
魏力
異動空間 - 魏力 舊文
