冰桶挑戰
2014年08月21日
恒生指數破關而上，升上6年新高，分析家紛紛發出價高勢危的警告，情形好似玩依家流行的冰桶挑戰，大盤冷水照頭淋。專家冷水淋頭，不過港股就仲未肯調整，昨日繼續企硬係25000樓上。
淋冷水要識揀時機
專家對個市充滿戒心，最大理由係講依家無論香港同中國，經濟都唔係咁好喎，個市點有條件爆上先？所以升得高的都會跌得甘。對於他們好心的忠告，有中環茶友話，審慎投資幾時都無錯，你話升得高的終於都會跌就實啱?，但關鍵係升多幾多先會跌，因為有好多時，散戶都係太早恐懼、太遲離場，當個市升緊就離場，到個市癲晒時就忍唔住入場，所以玩冰桶挑戰，最難就係幾時淋冷水先至啱。
聽完茶友咁講，陸羽仁回應就係散戶投資要有一套買賣技巧，時時有兩手準備，升嘅時候唔好太勇，適當時食吓胡；跌嘅時候要敢買貨，唔使話清晒倉。以依家市況計，指數升到6年高位，風險自然係加大咗，但同時你睇吓街邊擦鞋仔，係唔係咁多人炒股炒癲呢？如果唔係，大戶猛殺落嚟，又掠到邊個啲水呢？股市係大多數人睇錯的地方，如果咁多人爭住淋冷水，個市短期有可能調整吓，但又似乎未到大冧時。
大市唔肯跌，周初攞晒威嘅中移動(941) 同中海油(883) 唞氣，大戶又挾起友邦(1299) 同騰訊(700) ，係兩股力撐下，恒指全日微升36點；國企指數則跑輸恒指報跌收市，全日成交僅逾700億元。
恒指昨日全日收報25159點，升36點，雖然指數連續企係25000點關口樓上，但仲未代表呢個關口守得穩。
藍籌股最威係友邦，昨再創上市新高，收報43.9元，漲2.2%；騰訊升2.1元，收報131.9元，兩隻股份已合共貢獻恒指71點升幅。前日公佈業績的平保(2318) 成績唔差，中期多賺19%，但股價仍跌0.7%，收報65.35元；中行(3988) 中期多賺11%，不良貸款則「雙升」，股價就自然偏軟。
另外，資金似乎再翻炒本地地產股。長實(001) 報147.6元，升1元；恒地(012) 收報51.05元，升1.05元；落後嘅恒隆地產(101) 罕有成為表現最佳藍籌，全日升咗3.35%。
市場估計會繼續搵吓嘢嚟炒，彭博社上日報道，全球光伏業會扭轉過去兩年產能過剩狀況，面臨大規模的太陽能板短缺，主要原因是之前供應太多，令不少公司倒閉，倖存者紛紛減產，令行業出現自2006年以來首度的求過於供的情況。
光伏業現跳躍式增長
繼彭博的報道後，內地媒體亦指出，從國家工信部獲悉，今年上半年中國光伏產業發展，延續了去年下半年以來的回暖趨勢。中國多晶矽產量6.2萬噸，按年增一倍，上半年中國光伏製造業總產值超過1500億元人民幣。
另外，工信部預期，今年下半年隨着國際產業發展變化，特別是第四季由於要衝擊10GW中國裝機目標，中國光伏產業可能出現跳躍式增長。
睇番太陽能股表現，今年保利協鑫(3800) 股價由低位回升50%，不過仲同近年高位3.17元有距離，係大市升上6年高位計，唔算跑贏大市。業內其他股份好似順風光電(1165) 、漢能太陽能(566) 等，表現都叫做差唔多，喺利好環境之下，且看呢類股份會唔會借勢炒吓。
陸羽仁
金融High Tea 舊文
