港陸效應
2014年08月13日
財金高官接連開口，警告香港有爆發完美金融風暴的可能；又話美國加息香港會受衝擊，不過港股就無理，周一升完三百點，昨日仍然拒絕調整，再升幾十點。
陳總首認滬港通引資
高官講金融風暴講開有癮，金管局總裁陳德霖再開腔，話7月上中旬資金流入本港與實體經濟活動有關，涉及商業併購活動及上市公司派息，但7月下旬流入的資金部份流向股市，或與「滬港通」快將落實有關，加上基金經理對新興市場及中國看法轉好，將資產重新分配至內地及香港股票。
佢又提醒，這些資金有機會流走，但考慮到現時市場氣氛及本港貨幣基礎龐大，預期資金突然大幅流走的風險不大。
呢次喺資金流入香港以來，首度有財金巨頭證實可能同滬港通有關，究竟有乜嘢令到陳總得到呢個新結論就不得而知，但從最近一個月，同A股有關的ETF成交大增，以及發行商紛紛收到認購大「柯打」，已經反映咗好多錢流入，而且仲係買市多過買股，索性掃起一籃子的股票基金。
港股前日急彈314點後，照計就應該調整吓，結果雖然受內地股市回軟的壓力下，最多跌過94點，隨後沽盤收斂，尾市開始倒升，恒生指數全日收報24689點，小小哋升咗43點，成交664億元，個市唔肯跌，資金唔落盤，變成咗買賣兩閒。
近日不少公司併購，矚目一單係和記港陸(715) 股權易手，內地上市公司泛海計劃以最高約38.3億元，收購和黃(013) 持有全部71.36%的和記港陸股份，和記港陸爆升，收報0.88元，抽升35%。
和記港陸前身係港陸集團，主要係做忍者龜的生產商，由於業務非常波動，上市後無以為繼，控股權輾轉落入和黃手中。公司過去有投資內地物業，但手頭仍有不少現金，故此係靚殼一隻。對和黃嚟講，呢件資產賣唔賣都得，家佢願意割愛，一係買家身份好特別；又或者係出價好好，令和黃管理層覺得套現有着數。
股民跟炒四圍?
一隻30幾億元的靚殼易手，股價隨之爆上，自然令股民「四圍?」，睇吓有無相似概念跟炒吓，同樣由大老闆控制之恒基發展(097) 應聲彈高4%，傳過會賣盤嘅世紀建業(079) 仲勁，一下彈升咗約三成。
仲有一隻力寶華潤(156) 上星期停牌，市場又估佢係咪賣盤呢？結果揭盅暫時只係出售珠海一個項目，公司復牌後股價只係微升。力寶華潤帳面淨值45仙，股價41仙，以股仔嚟講佢折讓算係極細，咁一來係反映佢部份資產價值可能高過帳面，另一個原因係大家都估佢有機會賣殼囉！
小恒基本來持有煤氣等股權，後來出售給公司恒基地產(012) 後，公司變成只有少量內地業務，基本上係靚殼一隻，所以每隔幾年就炒一轉賣盤或注資。呢啲炒殼活動，基本上係資金驅動市況下嘅例牌動作，市場有錢郁，自然有人會搵嘢炒。
陸羽仁
金融High Tea 舊文
