疑似佔中效應
2014年08月28日
8月就嚟又過去，同過往月尾唔同，今個月除咗有期指結算，仲多咗個「大限」，就係人大常委會就政改框架作出解釋。
照牌面嚟睇，人大解釋無可能符合佔中人士「真普選」的要求，於是今個月尾、下個月初會否爆發佔中，以至搞出大頭佛，開始成為話題。外圍股市偏穩，內地股市又微彈，港股就跌穿兩萬五千點，有人就賴咗同佔中有關。
跌市要搵個理由
人大常委喺月尾開完會，解釋跟住出籠，接下來人大副秘書長李飛下個星期會落香港解話。睇電視訪問發起佔中的港大學者戴耀廷話初期唔會有大型佔中活動，實際反應要睇市民有乜反應。不過，昨日就有報道話8月31日就會啟動佔中，當然啟動唔代表即刻就爆大鑊！如果照呢個日子推算，咁今明兩個交易日就係佔中前最後兩個交易日。
照形勢發展睇，佔中發生機會好大，但點樣影響股市會好唔同。一個可能係好似東歐顏色革命，群眾聚集不散，終於搞到政府垮台，咁搞自然好大件事，股市跌到一仆一碌；另一個情況係好似美國佔領華爾街，由於運動缺乏建制支持，媒體普遍冷待，結果搞咗段時間就俾人撳咗落去，期間股市波瀾不興，相當平靜。
以香港目前情況嚟睇，佔中好可能係接近美國模式多過東歐模式，皆因香港係富裕社會，大部份人都唔想亂，搞到經濟，所以昨日個市下跌，就算真係同佔中有關，相信都只係好輕微嘅心理反應。
港股跌市同佔中拉上關係，主要係搵唔到其他原因。美國耐用品定單大增，標準普爾500指數收市首次升至2000點水平，創歷史新高，港股本來已經高開60點，但之後大市無力再上，午後掉頭回落，最多更挫191點，收市前跌勢略放緩。恒指全日收報24918點，跌155點；國企指數收報11074點，跌50點，成交增加至676億元。除了賴佔中外，結算前淡友撳低吓個市，可能係比較合理嘅解釋。
內地保險股陸續公佈業績。新華人壽(1336) 中期多賺71%，業績公佈後股價先升後回，高盛發表報告，認為公司業績勁過預期，維持「買入」評級，12個月目標價29.97元。
報告指出，新華保險新業務價值按年升18%，比高盛估計升5%為佳，內含值也升兩成，勁過該行預期升14%，純利升71%，大致符合早前盈喜公佈的情況。新華保險投資收益只有4.8%，比高盛估計的4.9%為低，但淨投資回報達4.9%，就優於高盛估計。
電動車概念爆上
彭博引述消息人士報道，中國政府正考慮投放最多1000億元人民幣設立基金，用作支援建設電動車充電設施，支持電動車發展，消息刺激相關股份造好。比亞迪(1211) 升5.9%，報53.9元；早兩日專欄提過嘅泰坦能源(2188) 亦漲6.2%，報1.2元。
內地9月起已免除新能源汽車購置稅政策，並要求政府部門採購電動車，作為公務用車，相信扶持政策會陸續出台。
另外，有「股壇長毛」之稱的David Webb，於8月20日增持鱷魚恤(122) 50萬股，每股平均價0.44元，鱷魚恤發力飆升，收造0.51元，狂飆14.6%。
大股東林建名早年曾經建議私有化鱷魚恤無法成功，之後股價載浮載沉。無錯鱷魚恤資產折讓係好大，但如果林建名掛住識女朋友，一味沉醉於爺孫戀，係都唔肯搞嘢，股壇長毛可以點樣令資產價值釋放出嚟，都幾有疑問，所以股民跟炒最緊要唔好跟車太貼。
陸羽仁
金融High Tea 舊文
