俄資入亞
2014年08月07日
烏克蘭危機升溫，美股上日大跌過百點，不過內地A股先跌後回穩，上證指數守穩2200關收市，帶動恒生指數早市最多下挫251點後，最終收復大部份失地，重上10天線收市，報24584點，跌64點；國企指數收報10979點，跌29點，成交金額再次回落至700億元以下，僅得697億元。
藍籌股個別發展。匯控(005) 跌0.3%造83.3元；港交所(388) 中午公佈上半年多賺2%，股價全日微升0.12%造174.5元；騰訊(700) 跌0.45%造132.9元；旺旺(151) 揚2.07%收報10.86元，跑贏一眾藍籌股。
烏克蘭緊張局勢升溫，美股再作調整，港股跟跌已是意料之中，要留意嘅反而係港股跌幅唔係咁足，呢樣嘢係咪同全球資金大執位有關呢？
美股呢鋪插落嚟，大背景係美國最近出籠嘅數據，好嘅多衰嘅少，所以就算聯儲局主席耶倫扮晒鴿派，都阻唔到市場預計加息。
美股喺突破萬七點高位，本來已經想搵位調整，家偷步借息囗轉向沽吓貨，屬於正路到唔正路嘅反應！
歐羅英鎊腳軟有因
呢幾日出現嘅因素，係波蘭官員報稱見到俄羅斯係烏克蘭邊境集結兵力，令市場擔心歐洲局勢惡化，引起加強制裁俄羅斯的預期，有分析話由於擔心西方會凍結俄國資金，所以有熱錢逃來亞洲。
陸羽仁早兩日同位猛人傾起，佢話好多俄國錢已開始流出歐洲同英國，所以你見到歐羅同英鎊呢排會咁弱。
雖然猛人話俄國錢鍾情新加坡多過香港，但過河點都會濕腳，咁就解釋咗點解有錢會源源流入，同埋港股會跌得少過西方市場。從個股表現嚟睇，同樣係中資股強過係歐洲落重注嘅和黃(013) 。
家港股炒家，唔少埋咗位炒滬港通，早排個市升到出乎意外，佢哋順勢食咗一浸胡，暫時都唔急於炒上。不過，從短炒角度，個市如果回深啲，又可以吼吓啱炒的股份買定啲。
證券商股逆市炒
個巿興炒的股份，一類是證券商股。幾隻二線證券股未有跟隨港股下滑，信達國際(111) 勁抽26.4%；華富國際(952) 更告爆升30.86%，表現冠絕港股；第一上海(227) 五連捷，持有光大證券的光大控股(165) 再受追捧，股價逆市攀升7.22%收報14.26元，升咗咁多，未上車者多數都只係睇佢哋表演啦。
至於早前發盈喜的國泰君安(1788) 公佈今年上半年業績，純利大升1.85倍。公司行政總裁閻峰已留意到，資金有明顯流向本港的趨勢，反映市場開始為10月中旬開展的「滬港通」囤積資金，成內地同業「駁腳行」對象。
該行財務總監黃天禮亦話，若A股未來表現向好，不排除資金會繼續流入，但仍要視乎歐美市場會否復甦並吸引外資。
他指出，機構投資者客戶比重增加4個百分點至24%，滬港通開通後，將吸引歐美機構投資者從香港投資A股，成為下半年營業增長點。
他預期，本港散戶會傾向從AH股較大的溢價獲利，希望藉此機會擴大本港散戶的比重。近期內地客來港開戶數量大增，內地亦將會掀起投資港股的熱潮，但內地客來港開戶的熱潮不會隨「滬港通」的開展而減退，因港股只開通大型股票，未能滿足內地散戶以中小型高增長股為主的投資需要。
對於國泰君安國際中期勁賺多1.85倍，匯豐證券發表報告指出，國泰君安中期純利大升，主要是2013年同期基數低，因此匯證對該股中期業績大升不感意外。
由於國泰君安現時預測市帳率達2倍，與同業1至1.7倍略高，故對其股價前景抱中性看法。
陸羽仁
金融High Tea 舊文
