靜候新水
2014年09月02日
9月份第一個交易日，出現咗好淡爭持，美國預託證券低收，但港股開市無耐就回升，不過升勢亦唔係幾夠力，無力向上突破，結果只係微升收市。有中環茶友問陸羽仁點睇，我就話個市似乎都仲係關注緊歐洲係咪會放水，資金暫時都仲係傾向買嘢多啲。
歐洲樣衰遲早量寬
本來，十個牛皮九個淡，個市升咗咁多，都好大可能會調整，要留意嘅只係歐洲經濟睇落都幾差吓，昨晚公佈歐羅區、德國和法國8月製造業採購經理人指數(PMI)終值，均創近一年或以上低位，主要受到新定單表現疲弱等因素所拖累。
歐洲數據咁差，睇嚟量寬只係遲早嘅事，最近美元轉強，美國債息再下跌，都係反映投資者預見歐洲又印銀紙，歐羅不值錢嘅情況出現，預先走咗出嚟買嘢，假如情況持續，相信大水遲早衝到龍王廟，搞到全球股市上漲。
不過，聽完陸羽仁咁講，股民都唔好即刻仆入市買嘢喎，因為歐洲做嘢一向唔係咁快，要搞量寬都要車前倒後，係都要搞一輪程序，所以較穩妥方法係低就買吓，靜候有無新水流入，因為買得平，心理壓力就細好多，唔使捱價捱得咁辛苦，贏錢機會自然大咗啲。
港股昨日升完無力，主要受累官方上月製造業採購經理人指數略差過預期，同時匯豐中國8月份製造業PMI終值向下修訂至50.2，港股低開39點後雖然掉頭回升，最多升149點，但喺數據唔靚影響下，午後港股一度短暫倒跌，尾市回升，僅收24752點，升10點；國企指數收報10958點，跌4點，成交縮減至619億元。
滬港通在過去一個周末順利完成首輪全網測試，市場憧憬10月份滬港通將如期啟動，加上IPO分流資金逐步回流股市，內地兩市高開後愈升愈有，以近全日高位收市。
上證指數收報2235點，升18點；深成指報7941點，升99點。雖然內地股市造好，本港上市的A股ETF就無跟足。安碩A50中國(2823) 收報9.23元，無升跌，南方A50(2822) 造9.43元，微升0.1%。
航空股借勢炒番轉
香港航空傳遞交上市申請籌39億元，兼且內地航線燃油附加費將下調，內地三大航空股起飛。國航(753) 彈3.75%，收造4.98元，升幅是國企指數成份股最勁；南航(1055) 、東航(670) 都略有進帳。南航上升1.15%，報2.64元；東航亦升0.76%，造2.65元。
收市後，市建局公佈，信和置業(083) 及華人置業(127) 投得市建局觀塘市中心計劃第二、三發展區項目。局方相信他們憑着在本港的豐富房地產經驗，將會成功發展此項目。
觀塘市中心計劃總共分階段發展五個發展區。今次招標的第二及第三發展區，提供約1700個住宅單位，住宅總樓面面積約150萬方呎及約36萬方呎包括零售店舖及公共交通設施。
今次項目規定零售商舖要交回給市建局，競投曾經試過流標，主要係市建局要求中標者興建大型豪宅，唔少財團覺得一下子推出咁多大單位，市場唔係咁容易消化，風險相對大增。面對市場現實，市建局唯有修改標書，增加興建單位彈性，終於順利批出。
過往信置投地以勇猛見稱，但近年作風略有改變，喺近兩年地價高峰期唔係買咗好多地，喺未投呢個項目之前，公司基本上零負債，手頭仲有幾十億係手，加上今次係同華置合作，中標消息相信屬於中性。
陸羽仁
金融High Tea 舊文
