最後探戈
2014年09月03日
中美股市呢排唔錯，反而港股「發吽哣」。踏入9月，美股有兩個概念可能有得炒吓，一個係阿里巴巴上市，另一個就係蘋果推出新的iPhone。
阿里上市扭扭擰擰，情況同蘋果推智能手機嘅日期變嚟變去有啲似。不同嘅係，阿里喺美國上市，事前好多人有疑問，寧願眼見至係當真，蘋果出新手機就唔同，時間只差遲與早，點都會有應市日子，所以一踏入9月，市場就開始炒作呢個概念。蘋果股價搶閘爆上創新高，連帶相關概念股都郁郁哋。
同投資銀行家傾起，佢話呢次蘋果出新手機，傳言會係用屏幕做賣點，相信新產品成功機會極大，因為蘋果本身有唔少死忠果粉外，有啲喺唔同制式間游移的花心派，都等緊呢次蘋果出新機，故此好有機會可以令蘋果重新擴大番市場份額。
蘋果新機概念漸入高潮
新產品未出場已有票房保證，投資銀行家認為今次喺炒蘋果的最後探戈，因為照佢估計，呢次係喬布斯iPhone概念智能手機後的末代延伸，出完呢隻產品，相信唔係咁輕易可以研發出另一隻有市場保證的產品，可能蘋果總裁庫克都睇到呢點，於是就趁股價創新高後減吓磅。股民如果跟炒呢個概念，都要計住時間落車，因為可能產品應市叫好之日，已經係股價見頂之時。
中移動(941) 北京啟動蘋果iPhone6預約，股價以高位收市報98元，升2.13%，再創多年新高。
炒作滬港通又熱身
呢兩日內地股市表現好過香港，滬港通效應似乎發揮得好啲。上證收報2266點，升30點，再創今年新高，炒AH股差價嘅中資股又見有鑊氣。
霸菱亞太區股票投資董事方偉昌就話，香港投資者對A股市場投資意欲大，由於A股的價值仍偏低，相信滬港通開通後，投資者會關注AH差價股。長遠來看，公司本身具質素，屬地方優質及獨特的股票，將受惠於滬港通。
霸菱中國股票主管羅瑩認為，過去如台灣、印度等資本市場自由化，都令市值大幅提高。滬港通並非短期的催化劑，能令A股市場更健康發展。
俄羅斯政府早前指傳染病爆發，禁止從歐盟進口豬肉，改為討論允許從中國和韓國進口豬肉。萬洲國際(288) 開始商討向俄羅斯出口豬肉。該公司董事長萬隆表示，俄羅斯很快就將向中國開放豬肉市場，估計今年下半年有機會向俄羅斯出口豬肉。
可惜消息未能刺激股價，萬洲收市報6.38元，跌1.4%，繼續喺掛牌後低位徘徊。中環茶友慨歎，市場上好多股份平都無人買，好似萬洲係豬肉加工商嘅龍頭大哥，為了可以上市不惜劈價賣股，掛牌之後曾經炒上，但在呢排個市調整下，佢就落番晒嚟，只能話市場上好多豬肉股曾經令股民失望，搞到大家對呢類股份失去信心，遇見咁嘅情況只能講句無奈！
陸羽仁
金融High Tea 舊文
