異動空間：混亂市最佳策略
終於捱到第四季。單用一個捱字不足以表達今年嘗盡的辛酸，講今年炒股好似一個碼頭咕喱，大汗疊細汗搬貨10粒鐘，收工出糧得一千幾百蚊，?條街轉個彎就俾賊仔刀仔架頸搶走，夠曬慘無人道！除非玩一鋪賺?割禾青，否則要將首季利潤keep到第三季，難過搶部iPhone6 Plus。
首季齋衝科網手遊股，棍棍大陽燭，敢追就贏。炒股講節奏，食準個拍子，高沽低撈，庖丁解牛，靈感話來就來，成個藝術家咁。去到4月宣佈要搞滬港通，調子即由C major變成D minor，時光倒流至2007年，要炒港交所(388)、AH折讓股，套拳完全唔同耍法，話轉就轉到？勉強買?一批，結果震到體無完膚，輸到講?都走音，輸錢輸信心都算，節奏完全打亂，之後都係跟出跟入，冇曬風格，仲要賺頭蝕尾，半新股炒嚇，殼股又執兩隻，勁似雜貨舖，好彩?贏六輸四，扣埋使費，剛好夠交水電煤。
去到7月，恒指終於破位喇！但如果唔炒港交所、中移動(941)，基本上無飯開。殼股係狂炒，但震過貓王，買得唔多，贏得更少。9月插到飛起，第四季攻略？勿手多，還看佔中點收科。
魏力
http://www.facebook.com/2012jason
魏力
異動空間 - 魏力 舊文
