佔中影響勿睇少
2014/10/3 上午 07:53:01
網誌分類: 經濟
佔中停不了，國慶同重陽長假期，港股休市，對港股的實際打擊，有幾大劑？暫時未知，估計凶多吉少。遠至地球另一邊的美股，災情已經見到，杜指在佔中期間的三日內，勁跌超過340點。如果傳聞話佔中有老美在幕後搞鬼，係堅料嘅話，美國人今次可以講係搬石頭砸自己嘅腳啦。
美股昨日有賴小型股卒先反彈，大市企番穩啲，杜指只係微跌4點，收報16801點，標普500指數靠穩，收報1946點，基本持平，納指逆市反彈，微漲8點，收報4430點。
有「末日博士」之稱的紐約大學教授魯賓尼(Nouriel Roubini)日前指出，依家有三個潛在危機，將引發全球金融動蕩，痛擊目前對美股前景仍然信心爆膨的投資者。其中一個就係香港局勢。佔中搞到香港經濟亂過九彩，損失慘重，單係酒店業就日損過億元，加埋其他行業，例如重創嘅零售業，就不敢想像啦。更重要嘅係香港局勢混亂，勢將分散中國搞好內地經濟的注意力，唔多唔少拖慢中國經濟的經濟步伐。
第二個危機係俄烏衝突或敘利亞衝突升級。市場目前普遍認為俄烏衝突、敘利亞內戰都不會升級或擴散，魯賓尼認為市場的評估可能是錯誤的。因為「普京權力在國內面臨挑戰，他的應對措施可能會更加激進。而敘利亞局勢趨於崩潰，正在破壞約旦、黎巴嫩和土耳其的穩定。」第三個危機係歐美各國正積極打擊ISIS(伊斯蘭國)組織，難免迫使這些恐怖份子作出復仇行為。考慮到數百個伊斯蘭國聖戰人員持有歐美護照，他們隨時可以在歐美境內發動恐怖襲擊，魯賓尼指中東亂局還未震動投資者，但歐美只要發生一兩次恐怖主義襲擊，股市重創程度難以估計。
美國昨日公布的就業情況十分不錯，最新一周首次申請失業金人數28.7萬人，較對上一周減少6千人，好過市場預期的29.8萬人，而美國企業9月計劃裁員人數大約3萬500人，創了14年新低。美企今年初至今，已宣佈計劃裁員約36萬人，較去年同期下降6.2%。當中裁員人數最多的行業係電腦業，宣佈計劃裁員4.9萬人，較去年增加近倍。就業情況不錯，但8月份的工廠訂單卻減少超過一成！叫人失望。
高盛將美國第三季度GDP增長預期值從3.1%下修為3%。不過仍遠比標普機構預期的高好多，後者預期只有2.2%；預期中國經濟增長7.4%，同阿爺的預期目標7.5%差唔多，最弱係歐元區，預期今年經濟增長只有1%。
事實上，美國就業數據持續好轉，前兩日跌得咁勁，超賣嚴重，但昨日反彈乏力，主要係市場對歐央行行長德拉吉感到有點失望，覺得他的實際救市行動，並不如口頭講的咁激。歐洲央行昨日宣佈維持0.05%的主要再融資操作利率(歐元區主導利率)不變，邊際貸/存款率依次維持於0.3%、-0.2%不變。
德拉吉表示，購買ABS(資産支持證券)和擔保債券計劃(類似美國的QE)的細節已經確定，計劃至少將持續兩年時間，由今年第四季開始，購債計劃規模約為1萬億歐元。德拉吉指出，兩項計劃加上9月中旬通過首次TLTRO向市場注資826億歐元，將對歐央行資産負債表産生很大影響。德拉吉嘅一萬億元QE規模，其實與他此前所講嘅差唔多，不過，市場見歐元區經濟有走下坡傾向，至9月份的調查數據反映經濟增長動能已經放緩。自然希望德拉吉會宣在加碼救市。但現實係，德拉吉未必唔想加碼，但身不由己。例如德國經濟研究機構IFO主席辛恩(Hans-Werner Sinn) 昨日表示，歐央行採購ABS和擔保債券的計劃超越了其使命範圍，敦促德國政府採取行動阻止歐央行的採購。投資者不滿德拉吉的救市措施唔湯唔水，就踩了歐股一腳勁嘅，歐股昨日大跌2.4%，其中德國挫2%，法國更勁插2.8%，歐洲跌得咁慘，美股彈唔起，都好易理解啦。
陸羽仁
回應(1) 我想回應
陸羽仁 BLOG 舊文
