滬港蟹
2014/11/18 09:07:38
網誌分類: 經濟
滬港通變滬港蟹。滬港通反應不如預期，加上好消息出貨，昨日港股高開225點，收市跌290點，開市高追、收市打靶都唔見515點。
其實唔少香港人本來都打算做精仔，諗住昨日滬港通開車派貨俾大陸人，但呢班南行列車實在太唔爭氣，香港人唯有互插，自己派俾自己。好似隻港交所(388)
就係咁，最多從高位跌6%，沽家都係不問價要走。不過佢唔算慘，有啲跌得仲甘，好似AH折讓股大連港(2880)跌12.2%，中港券商股第一上海(227)跌10.2%，唔在開市頭1分鐘走貨，根本走唔到。香港大市跌，內地人利用滬港通買貨，亦全部扮咗蟹。 不過內地亦有蟹，上證綜指由升1%變差不多平手收市，好多熱股都係先升後回，好似隻上汽(600104)，最多升10%，收市升3.2%，高追都無咗近7%。呢個故事教訓我地，事先張揚的好消息，即使最後開大，都可能因為太多人等出貨會回，若然開細，就回得更多。不過仍然係那一句，滬港通長線睇好，要慢慢來。
美股繼續發呆。日本第三季經濟衰退，美國10月工業産出意外下跌，投資氣氛不振，美股早段反覆偏軟，午後傳來多家美企併購消息，美股反彈，尾市由跌轉升，但幅度不大。杜指收市微漲13點至17648點；標普500指數升2點，收報2041點；納指逆市微跌18點，收報4671點。
日本今年4月調升消費稅至8%，結果搞出個大頭佛，日本7月整體家庭開支按年跌5.9%，第二季經濟增長較去年大幅萎縮7.3%，分析估計可能係剛增加消費稅，消費者未習慣，所以經濟轉差，以為第三季經濟表現會因為消費者習慣咗俾多啲稅，會提高番消費，市場預計經濟會有2.1%增長，點知本地生產總值再跌1.6%。據經濟統計學家Julius Shiskin在1975年紐約時報的文章，對經濟衰退的定義，其中之一是「國內生產總值連續兩個季度下降」。日本經濟在過去四年以來，已經係第三次發生衰退。
日本經濟咁差，股市當然無運行啦，日束股昨日就勁跌3%！係8月以來最大單日跌幅，日圓兌美元低至7年以來新低，美元兌日圓升至117日圓水平，今日早段報116.67日圓。摩根大通東京研究部主任Jesper Kol表示，「日本現已正式陷入衰退」，估計日本首相安倍會暫時取消提高增值稅的提案，佢原本考慮明年10月再上調消費稅至10%。
日股跌得咁甘，亦影響到美全球投資情緒，再加上美國工業數據麻麻，導致美股早段受壓。美國10月工業的産出較上月跌0.1%，差過市場預期的增長0.2%，而且係過去三個月來第二次環比下跌。不過午後傳出油田服務業巨頭哈利伯頓公司(HALLIBURTON)已同意收購其競爭對手貝克休斯公司(BAKER HUGHES) ，以及製藥商阿特維斯(ACTavis) 已接近收購艾爾建(ALLERGAN) ，成個市又生曬，大市收復失地。美股在高位都企得好硬。
陸羽仁
回應(2) 我想回應
陸羽仁 BLOG 舊文
