買股有宗旨
2014年11月18日
滬港通開波，結果真係出現北上熱、南下冷的局面，返內地買股的配額到下午兩點就用晒，南下買港股的配額就唔係點郁，到收市亦只係用到全日限額的16%。睇到形勢唔係咁靚仔，港股唔單止愈升愈少，跟住仲轉升為跌，臨尾再踩落去，跌咗近三百點收市。
吼位買績優股
對於滬港開通，陸羽仁昨日講咗，小心好消息出貨，短線有戒心，中長線睇好，?家睇法都無乜點變。滬港通有好多基金錢係想返內地投資，但唔係話有大把錢等緊落嚟，尤其內地股民對大股無乜興趣，只係鍾意炒細股，形成資金北流多過南流，加上你睇相關概念股好似港交所(388) 由有呢個消息起計，已經大升超過一半，喺咁情況下有獲利回吐就唔出奇啦。
好消息見光出貨，個市要消化幾耐就要再睇吓，仲要睇美股會唔會調整。在呢啲環境下，股民入市可以揸住兩個宗旨，一係唔使太心急，啱價先買；二係唔止睇概念，最好揀啲有業績支持嘅股份，好似業績有保證的國泰(293) 或者本地銀行股，咁就會穩陣啲。
我剛剛在加拿大多倫多返來，呢啲非旺季，商務位都爆晒，國泰客運都幾得呀，油價係咁跌，佢都OK㗎。
滬港通首日啟航，港股全日先升後挫，波幅高達526點。恒生指數收報23797點，跌290點；國企指數收報10554點，跌207點，成交金額830億元。港交所曾見189元後倒跌，收報178.1元，挫8.3元或4.5%，藍籌中表現最弱早前升得多的AH折讓大股份被拋售，更是跌市重災區。
港股呢排除咗炒作滬港通，好多股仔都有異動。好似千年呆股金山工業(040) ，呢幾日竟然炒上咗幾十個巴仙，中環茶友話，佢自己個投資組合裏面，都有一批股份，佢擺喺度當係倉底貨，兼做埋「路邊雞」，用嚟測試大市炒作氣氛，最近呢批「路邊雞」紛紛有炒作，顯示係市場投資的資金都幾活躍。
金山工業發市當三年
好似隻金山工業，茶友話佢擺咗喺度無五年都有三年，股價一直水波不興，但勝在派息唔錯，所以咪任佢留係度做吓路邊雞，點知上個星期日，忽然話股神巴菲特買起金霸王電池，於是大家炒作佢有相同概念，股價一日暴升咗四成，跟住仲有股評分析，話佢資產有成1.8元，而且又有上市地位，左睇右睇都係超值，於是昨日一開市就再湧咗上去。
茶友話，金山工業無錯係有唔錯資產，但佢老闆做過前朝行會成員，係好老實的工業家，無乜興趣炒股，所以資產高、股價低的情況一直存在，唔係新鮮事物，?家突然當係發現新大陸，股價失驚無神炒咗上去，都未必真係有料到，但都有可能只係有啲熱錢搵嘢炒，估計呢個潮流無咁快過去，炒股仔應該仲搵到餐晏。
本着有胡唔食、罪大惡極嘅精神，茶友立即趁高沽咗一半貨，佢話都唔知隻股仲有無得炒，不過隻股三年唔發市，唔知發市又係唔係要等三年，佢入貨價係中長期支持水平，跌唔跌得好多，食住一半胡，如果繼續炒，咁仲可以食完三番等爆棚！
個市有氣氛，去到年尾都仲有新股上市。即將上市嘅楓葉教育(1317) 初步招股文件指，是次招股引入三名基礎投資者共認購7650萬股股份，相當於今次發行股份的22.9%，按招股價2.23至3.07元計，涉資約1.7至2.3億元，有六個月禁售期。
該三名投資者分別新華保險(1336) 與新華資產管理分別持有60%及40%的新華資產管理(香港)、IFC(國際金融企業)、Edmond de Rothschild Asset Management(France)，係新股熱鬧下，教育概念都吸引到大戶捧吓場。
陸羽仁
金融High Tea 舊文
