錯把牛當熊
2014/11/5 上午 08:30:40
網誌分類: 經濟
日本大放水，日股市升完又升，繼上周五勁升5%之後，周一假期休市，昨日再漲2.7%。但對亞洲股市未有帶來幫助，除了中國A股有些微進賬之外，港台韓國都唔係幾得。歐盟委員會將今年歐元區GDP增長預期由1.2%大幅下調至0.8%；明年則由1.7%下調至1.1%。而更嚇人嘅係對今明失業率預期，分別係11.6%及11.3%。失業情況咁差，經濟狀況可想而知。
歐洲經濟消息出爐，唔單止歐洲股市平均跌1%，其中德國跌0.9%，法國跌1.5%，歐元兌美元繼續尋底，最新報1.255美元，歐元兌美元今年4月份升至最高1.399美元，大約半年時間貶值超過10%；另外，油價亦受到歐洲經濟唔得，影響需求而再受壓。油紐約原油再跌1美元至每桶77.32美元。
外圍股市唔得，油價下跌，美元上升，美股表現反覆，杜指收市升18點至17384點；標普500指數收市微跌6點，收報2012點；納指跌15點至4624點。上日表現最差嘅源股及以海外業務股繼續成為壓住杜指嘅主要元兇，Chevron及Exxon Mobile昨日分別再跌3.8%及2.3%，Caterpillar跌2.8%，係杜指跌幅榜嘅頭三位。此外，美國9月貿易赤字擴大7.6%至430億美元，高過上月嘅401億美元及預期400億美元。期間出口下滑1.5%，係7個月來最大降幅。數據公布後，多家大行下調美國第三季GDP增速預期，巴克萊由3.4%降至3%；摩根大通由3.4%降至2.9%；美銀由3.4%降至2.9%；瑞信由3.5%降至3%。經濟預期唔得，當然對大市造成壓力，不過，睇美股表現頗為硬淨。睇股市恐懼指標VIX指數略為上升，但係維持在15下方水平，顯示投資者對美股後市仍然十分樂觀。
我經常講股市難測，隨時連大市嘅大勢，係熊係牛，隨時都會睇錯，散戶固然係咁，投資巨擘一樣會睇錯眼。不過，老外風度又幾好，睇錯了，又會坦白公開認錯。
Gartman Letter的作者Dennis Gartman在10月16日接受CNBC訪問時表示，全球股市沽壓嚴重，(當時杜指已經跌咗6%)係「熊市的開始」，而且會持續好一段日子(a long period of time)。點知話口未完，美股就同佢唱反調，至上月31日，杜指反彈8%！周一佢再上CNBC，公開認錯，話那段時間，他覺得大市好熊，所以避開股市，但事後發現睇錯市，而且不得不承認，現時還是牛市。又話佢今年總體投資還有8.3%進賬，如果唔係睇錯市，賺嘅錢肯定更多。
Gartman認為聯儲局在周三宣布終止買債措施，但美股不跌反升，至周五，杜指已經升了2%，反映投資者已不太關注QE的完結。他對於仍有好多投資者仍然抱著絕錯誤的睇法，仍然認為美股即將進入熊市，相當之詫異。他指出這些投資者忽略了歐洲央行及日本央行正在大力放水的事實。另一個大型的QE即將來臨，股市隨著資產價格的上漲，大市仍將向上。
事實上，有相同睇法嘅投資者唔止Gartman，高盛美國首席策略師David Kostin上周已預測大市年底仍會再創新高。不過，亦有分析指出美股即使上升，但幅度唔好期望會好高，因為美國經濟復甦的利好因素升幅已經反映在美股近期的升幅上。對於買邊隻股，Gartman推薦直接受惠經濟增長的股票，例如金屬股、鐵路股及造船股，其中最喜觀嘅係美國鋁業。
陸羽仁
回應(0) 我想回應
陸羽仁 BLOG 舊文
