真正贏家
2014年11月11日
滬港通一波三折，本來塞住通不了，但在特首梁振英上京見國家主席習近平後，游說掂習主席放行，加上曾財爺亦一路有游說李克強總理，中央就順水推舟送吓禮，一日內轉軚通車。政治天氣陰晴不定，變化好快，中央對佔領運動採取長期作戰策略，堅定支持梁振英同警隊有機會就去清路，但又開通兩地股市互聯互通。消息公佈後，恒生指數一度爆上560點，但到下午3點內地收市後升幅急促收窄，只升194點，有小小反高潮的味道！
滬股升幅遠超港股
陸羽仁同茶客傾起，滬港通由唔通變通，轉得咁快，呢點證明政治係幾難捉摸。不過，滬港通雖然由「唔知幾時通」變咗「話咁快就通」，但市場只係興奮咗一陣，以收市升幅得0.8%計，仲少過台灣的1.5%同韓國的1%升幅，都唔好計內地上證綜指升2.3%咁多啦。家北京正開緊亞太經合組織會議，全球聚焦區內有乜搞作，阿爺又搞新絲路，又搞亞太自貿區，對亞洲股市有提振作用，在咁嘅環境下，滬港通對恒指嘅刺激，得雞碎咁多，甚至好消息變成散水機制，說明滬港通呢樣嘢唔急得。
我聽金融界猛人講，滬港通啟動，至少最初一段時間，資金北上機會係大過南下，故此內地股市受惠會明顯啲。喺啟動消息出台後，果然係內地股市升好多。上證指數午後升勢強勁，愈升愈有，以全日最高位收市，再創新高，收報2473點，漲55點，幅度有2.3%，比香港升幅超過一倍；深成指收報8410點，漲175點。內地股市係真正贏家，有說內地財金官員買重A股，滬港通唔通佢痛過你，所以死都要放行滬港通。
各板塊中，證券商股早段曾有獲利回吐，午後急漲逾4%。市場料中鐵建(1186) 或向墨西哥政府追討賠償，帶動股價急漲5.11%。習近平加快新絲路所謂「一路一帶」建設，相關概念股齊漲。如果估計內地股市受惠會大啲，炒滬港通概念仲係以A股關連同有差價的股份着數啲。
零售商備戰光棍節
港股炒滬港通虎頭蛇尾，可能都仍然受制於佔中未完，一炒高就有人散水。恒指昨日雖然一度高見24110點，但最後挨近今日低位23703點收市，若然一見高位就隊，可以即日執407點，可見政治市難炒。
港交所(388) 揚8元或4.56%，收183.6元，跑贏一眾藍籌股。憧憬滬港通令AH折讓收窄，相關股份再落鑊，絲路股、自貿股概念亦殺上，借中韓將訂自由貿易協定，大連港(2880) A股升停板，H股大升23.9%，上海電氣(2727) 抽升14.4%。醜股重鋼(1053) 飊28.8%，馬鋼(323) 亦升19.7%，大炒中國基建出口，可以話炒嘢此中尋。
另一個炒作概念係「雙十一光棍節」，呢個網企搞出來嘅「節日」主要係促銷，令好多零售商都日益重視。好似賣鞋嘅達芙妮(210) 首席運營官胡煥新就透露，為應付今年「雙十一」，公司由三個月前開始準備，因定單數量較平常增加12至15倍；今年庫存準備達130萬對，去年為60萬對。他指出，電商銷售去年按年增長約三倍，今年仍在快速增長中，同時帶動門市銷量。
雖然港股未由滬港通啟動時間表大升，業內仍然相當重視，匯豐環球投資管理股票投資董事及中國部主管陳淑敏表示，滬港通啟動後將有560家內地企業供投資者選擇，可購買過往未能投資的企業。該公司看好公共設施、工業、房地產及非必需消費品行業股份，指這些行業股本回報率均高於過去10年，但估值仍然較低，預期未來相關股份估值將會提升。
陸羽仁
金融High Tea 舊文
