魚樂無窮：跟惠理翻兜東江集團
■東江集團由高位跌逾兩成，屬撈底之選。圖為集團主席李沛良。資料圖片
阿爺嚴打濫借孖展，中港券商股跌到一仆一碌，預計證券行短期會乖乖守規矩，依足本子辦事。今次A股大牛市，全靠資金推動，如今水源一緊，中港股市應該要靜番一輪。
由熱變冷，又係撈底好時機，好多人都會問，究竟幾時先係出手好時機。市場上門派多的是，散戶派就一定係要低過自己沽出價先會出手，專業派就會技術分析，睇平均線、RSI、MACD，務實派就會計估值，睇市盈率、息率。事實上，各門各派都有根有據，冇話邊個係正宗，更何況股市冇?同錯，只有贏家同輸家。
今日推介東江集團(2283)，由高位最多跌逾兩成，亦屬撈底之選，不過並非由於上述提及理據，而係跟金手指謝清海搵食。
股權披露資料顯示，惠理基金上周五增持東江至5.26%，持股首度曝光，平均增持價1.66元。受消息刺激，東江逆市炒高3.7%，收報1.68元，只較金手指增持價高兩格，值得跟掃。簡單再講東江賣點︰中期盈利增長37%，現價市盈率唔夠8倍，早前收購德國同業，向歐洲大展拳腳，平靚正也！呢轉博反彈先睇1.85元，水位剛好一成。
題外話，東江今次跌浪曾低見1.54元，較惠理「撈底價」低近一成，再一次證明就算係神人，都唔可以?最低位入市。
唐牛
https://www.facebook.com/tongcow88
唐牛
魚樂無窮 - 唐牛 舊文
