股燦任踩
2014年12月10日
香港投資者昨日真係嚐盡股燦滋味，內地股市龍咁威，香港就係軟皮蛇，到外圍有小小腳軟，港股已經大瀉，下午內地股市滑落，港股就直情暴跌，搞到股民身家又蒸發一浸。牌面睇港股大插同外圍有關，但講到尾都係大戶造淡之心未死，點都要借啲意踩個市落嚟。
空軍借勢發惡
美中兩個股市調整，主要係位高勢危，華爾街的老牛有番咁上下年紀，升得兩升就肯定要搵個理由唞氣。A股雖然係牛仔，但天生愛狂野，一升就連破幾個關口，升得急跌得快，無論上落都幾得人驚。好似滬市午後急插6%，一併失守3000點及2900點，而且成交持續熾熱，再創紀錄新高。全日成交金額12665億元，打破上周五成交10740億元的記錄。收市上證指數收報2856點，跌163點或5.4%；深成指收報10116點，跌438點或4%。
內地股市升得咁急，市場早就驚癲市會否惹來阿爺干預，股民普遍有玩閃避球心態，隨時準備一有風聲就先行走避，大市一插就無晒承接。A股呢隻牛仔誕生，好大程度係炒阿爺的政策，所以市場反應特別敏感。換個角度睇，阿爺唔想股市升得太急，但更唔想佢死翹翹，一輪震盪相信都係調整而唔係咁快散檔。
上證收跌5.4%，本地空軍借勢發惡，港股愈跌愈急，50天線(23538) 亦不保，一度瀉達648點低見23399點。恒指收報23485點，瀉561點；國企指數收報11332點，插540點，成交金額1442億元。陸羽仁希望呢一浸再插深啲，可以趁低吸納。
馬化騰旺市沽股
A股掉頭急跌，近日炒高的內地金融股急吐。最傷係內地證券股，銀河證券(6881) 、國泰君安(1788) 都插近13%。內地多隻保險股跌停板，當中包括國壽(601628)、太保(601601)及新華保險(601336)，內險H股沽壓持續捱沽，好多都跌近4、5%。可能呢排個市真係升得多，連大老闆都忍唔住沽貨，騰訊(700) 公佈主席馬化騰於12月2日至5日，合共減持2511萬股，每股平均價118.607至119.972元，套現近30億元，持股量由10.13%減至9.87%。
油價回落，產油國家似乎紛紛採取先死後生策略，任由油價跳崖式下跌。中國、日本及歐洲經濟數據都疲弱，伊拉克再踩多一腳，下調1月份針對亞洲與美國買家的「巴士拉輕質原油」售價。消息拖累原油期貨價格再插，紐約期油單日跌超過4%，去到五年低位。
油價無運行，大行繼續唱淡，摩根士丹利大幅下調布蘭特油價目標，將明年布蘭特平均油價由每桶98美元，下調至70美元。該行揚言，若油組不減產，石油市場將面臨2009年以來最大威脅，會有失衡風險，明年第二季供應過剩情況最嚴重，最壞情況布蘭特油價會跌至每桶43美元。
油價通常在西方冬季用油高峰期最硬淨，今年卻迭創低價，跌個不停，陸羽仁喺油價呢輪大跌前，在年中見高位時已經唔見睇好，因為無論從經濟、政治因素，各產油國似乎都無硬撐的理由，家齊齊放手，價錢自然插到阿媽都唔認得。咁搞法油企都咪話唔傷，單睇內地「三桶油」表現就知。佢哋股價低處未算低，中海油(883) 收報10.06元，中石化(386) 造6.22元，兩者同跌約4.3%；中石油(857) 跌3.3%。國泰(293) 得益油價下滑，全日漲1.7%，造17.54元，為表現最標青藍籌。
陸羽仁
金融High Tea 舊文
