滬股化
2014年12月03日
港股無厘頭急插後出現像樣反彈，同時換馬炒作好明顯，資金由其他類別股，聚焦返去有A股概念的公司，形成國企指數一早喺大市仲跌緊的時候就反彈，跟住仲帶返港股上去。本來陸羽仁期望個市跌深啲，有機會入多啲貨，暫時就未能成功，不過，股市一個星期開5日，機會多的是，今日買唔到都唔使急。
由於滬指連創新高，投資者買A股意欲增加，滬股通使用額度明顯上升，昨日額度還剩下96.89億元，用去額度25.5%，內地證券商股成為升市大贏家。有人笑言，滬港通啟動後，滬股通吃香過港股通，股市從來係跟紅頂白之地，大家自然追捧有A股概念的國企，搞到個市滬股化，呢個現象短期都好可能維持下去。
上證指數昨日輕微調整過後，昨日又大升3%，帶動港股午後曾飆逾400點，最終恒指收報23654點，升286點，升幅為1.23%；國企指數收報11125點，升307點，升幅達2.8%，成交金額1044億元。升市下內地攝像頭模組製造商丘鈦科技(1478) 首日掛牌低收6%，但尾市見到有護盤，比起跌18%的低位已有反彈，另一隻掛牌破底的東瀛遊(6882) 浮上水面後就繼續炒上。
有膽有力順勢炒
由恒指睇個市唔係咁夠力，遠追唔到內地升幅，若然比較埋國指同成交有咁多，反映唔少資金係沽咗手頭其他股份，買入國企股，所以我話滬股化依家只係熱起上來，而唔係終結，喺呢種大時代，有錢有膽者，仍然係昨日那句，可以順勢而炒。
既然內地股市熱爆，直接最得益係證券股，中信證券(6030) 升7.2%，海通證券(6837) 都升6.5%，成為國企指數成份股升幅最大首兩位股份。A股炒上，自然帶挈ETF急升。安碩A50(2823) 、南方A50(2822) 都升逾6.5%。
除咗證券商股，內險股係另一類，由於市傳阿里巴巴主席馬雲及騰訊(700) 主席馬化騰參與平保(2318) 配股，平保一度高見70.3元，收報68.8元，大升6.1%為表現最叻藍籌。我周一在網誌話平保批完股短期唔會再集資，係最平安的保險股(好老土咁玩食字)，結果平保周一在跌市中企硬，周二就彈上。至於國壽(2628) 升5.85%，收報27.15元；人保(1339) 升近6%。
雙馬係咪入股平保，對平保股價當然有影響，但內險股成個板塊炒上，唔係靠佢哋個人魅力帶動，或者掉轉講，係咪佢哋睇到箇中機會，先至有投資消息傳出，其他人跟風炒作這個板塊呢？
內險股呆咗幾年，主要係A股市場呆呆滯滯，家A股升穿2700點，跟住又話睇2800點，除咗買ETF，吸納投資內地股市的內險股，係增持中國股市的捷徑。不過，同其他金融股一樣，內險股有籌集資金壓力，個別公司已向股東伸手，平保搵到投資者定向配售，減少咗再向股東「籌旗」的威脅，同時仲顯示埋公司股票有價有市，「秤先」少少就無可厚非。
內房仍算落後
除了內險股，內房股都係值得留意的落後板塊，相關企業近日都有不少整合消息。內地傳媒引述消息人士報道，融創(1918) 有意聯合持有綠城(3900) 24.3%股份的九倉(004) ，發動全面收購綠城，粉碎綠城主席宋衛平回朝大計。受消息刺激，綠城股價受捧，升8.4%，收報8.15元，為表現最好「港股通」股份之一。融創早前向宋衛平支付28億元，作為入主綠城的「提親大計」。怎料內房市況好轉後，宋衛平其後有意「拒婚」，現時搞出一場大龍鳳，站在小股東角度，當然最好係大股東間打晒交，互相鬥擲銀彈「搶親」，咁就最皆大歡喜。
陸羽仁
金融High Tea 舊文
