中國狂牛
2014年12月05日
滬深股市好似我早前所講變咗癲！上證指數漲過百點，收市直逼2900點，深成指數也突破10000點，創二十二個月新高，搞到港股本來喺造淡陰影下，都夾硬夾上高收，呢舖內地牛鬥西方熊，戰況真係好激，鹿死誰手雖然暫時未知，但跟風炒作最緊要識企啱邊，買中內地當炒板塊就有聖誕禮物。
藥煲股都炒
內地財金政策真係轉向，人行繼續暫停正回購操作，本周淨投放資金300億元人民幣，連同今日進行的600億元三個月期國庫定存招標，人行持續向市場投放流動性。
內地股市反覆向上推動下，港股愈升愈有，恒指收報23832點，國企指數收報11481，升420點，成交略縮減至近1175億元。
中資證券股喪炒，中信證券(6030) 是升幅最大國企指數成份股，收造26.65元，飆11.5%，藥煲板塊石油及資源股都借內地提高能源礦產供應能力，集體炒上。
油價跌，陸羽仁認為國泰(293) 係穩陣之選。雖然機師工會昨發表聲明指，由於與管理層未能就薪酬達成協議，由今天開始，多地機師將嚴格按章工作，但公司就宣佈加薪平均4.5%，仲有一個月酌情年終獎金，空中服務員工會反應正面。
行政總裁朱國樑話，上半年受到燃油價格高企、貨運市場疲弱，下半年相對較佳，客運受惠於旅遊旺季的強勁需求、貨運市場近期有所改善及油價已回軟。消息公佈後，國泰股價造好，升上一年高位。
陸羽仁有機會和一位熟悉國泰業務的人士傾偈，問到油價大跌，生意又唔錯，國泰賺錢有無機會挑戰新高呢？佢就話今年應該難啲，皆因上半年油價唔算平，同時日圓下跌對集團業務有啲影響，但就覺得明年有條件更好。投資買前景，聽佢咁講股價升得急未必要高追，但有貨揸咗應該瞓得着覺。
太古三寶輪流炒
油價低，對國泰母公司太古(019) 都有利。太古主要兩瓣業務，地產係另一大瓣，今年零售弱咗，對佢嘅商場有多少影響。不過樓價貴，佢買樓收益應該補番有突，所以太古、太地(1972) 同國泰，三寶可以輪流換馬，總之邊隻貴就沽邊隻，換番平嗰隻，都係穩中求進的一招。
今年新股臨尾熱辣辣，中廣核電力(1816) 有多達13萬人認購，公司啟動回撥機制後公開發售部份佔全球發售比例增至20%，即17.65億股，撇除各人認購股份多寡因素，每人平均可分到約13手。有意見認為，大戶中籤率因此或較高，極有可能令孖展客即日放貨，股價或面臨沽壓。
不過，以往績計算，去年中國信達(1359) 超購逾百倍，有7.54萬人認購計算，人均可獲14手；最後一人至少一手，首日仍升25%，所以最重要仲係睇公司潛力，而且中廣核市值咁大，將來大機會成為指數成份股，成為掛牌後另一後着。
另一邊廂，集資高達300億的萬達商業地產，計劃於下周三(10日)招股，撞正另一重磅新股北京汽車。北汽將於下周一(8日)開始招股，集資約155億元，19日掛牌。兩隻股份概念無中廣核咁獨特，點樣吸客仲要觀察。
陸羽仁
金融High Tea 舊文
