異動空間：預測股市新招數
介紹個測市新方法畀大家，唔係用軟件睇圖，亦唔係望住邊盞燈去做對家，而係每日去《新華網》睇阿爺指示。記得星期一，新華網出咗篇文，講牛市存在四大風險，加埋中證監罰券商，嚇到當日大冧市。相隔一日阿爺個tone就轉曬，又呵又錫，指出「規範融資融券，讓牛市更加健康地向前走」，A股即刻收復失地。
阿爺嚇一嚇又呵番，慌死推冧個市，可見牛市對中央維穩相當重要。股市係經濟晴雨表，經濟復蘇先有牛市，但有內地財經評論員話，大陸經濟滑坡，所以要搞旺個市去救，中國式邏輯魏力搞不懂，但個市就係升畀你睇。
和記港陸（715）推介兩周升23%，「睇幾多？仲買唔買得？」其實終點喺邊冇人知，最重要係睇動力同走勢，對辦就揸，反之就沽。點為之唔對路？老土講句係「憑經驗」，可以分享但冇得教。齋望住目標價唔理走勢，後果係輸死多過賺死。瑞聲科技（2018）一直係做手機耳機，但最近已攻入手機鏡頭市場，技術更高到可以用手機，影到有景深的相片，直逼單反質素。由於係全新市場，隨時係未來幾年一個爆炸式增長點。
魏力
http://www.facebook.com/2012jason
魏力
異動空間 - 魏力 舊文
