中環在線：可愛「米奇則」係趙世曾手筆
■趙世曾（左）呢個由佢親手設計嘅米奇則，麥玲玲話比較適合用嚟度假。 
卓能（131）主席趙世曾除咗女友多，鬼主意都唔少。卓能八年前申請預售嘅荃灣油頭新盤壹號九龍山頂，抗戰勝利獲准賣樓，近日上載樓書，大家發現頂層有個「米奇則」，都大呼過癮，聞說呢個咁可愛嘅米奇則係由78歲嘅趙世曾親自操刀。
■壹號九龍山頂預料喺農曆新年前推售。 麥玲玲：住呢度女友多
趙世曾後生嗰陣喺英國讀建築，大學畢業後，就做則師同地產生意，聞說佢𠵱家喺寫字樓都會周不時畫則，露兩手。
壹號九龍山頂呢個米奇則近日成為熱話，接近趙世曾嘅消息人士爆料話，呢個則就係出自趙世曾手筆，「佢成日都想做特別嘅嘢，又鍾意圓形嘅建築物，呢個則係佢設計㗎」，佢畫完畀身邊同事睇，唔少人即刻話似米奇，趙世曾都好滿意。消息人士強調，趙世曾起呢個單位真係想賣，並非留起自用㗎。
不過，根據風水師麥玲玲所講，呢個四周圍都圓碌碌嘅單位，並非人人都啱住。麥玲玲話，圓形屬水，代表流動，要長住喺度嘅人，如果每個月有三分一，甚或一半時間出差咁就可以，否則健康就會差啲。佢認為呢個單位比較適合用嚟度假。
佢又講笑咁話，呢個單位都啱嗰啲想有好多女朋友嘅人住，「話唔定女友多到貨如輪轉」咁話。咦，咁咪好適合趙公子囉。
聽地產代理講，呢個八年抗戰勝利嘅新盤，應該喺未來兩個禮拜會正式開波，展開推售工作，估計會喺農曆新年前推售，第一批應該會先賣十個單位試試水溫。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
