等緊火箭炮
2015/01/22 08:47:04
網誌分類: 經濟
歐洲央行周四開會決定如何放水，嗱，大家小心反高潮呀，即係歐洲一決定放水，市場就話唔夠，無用，之前炒放水的歐股、美元、黃金就回吐。
美股大市昨日無乜方向，美股先升後回，尾市靠穩。有一點幾可肯定的是投資者對歐央行將大手筆推出救市措施，態度樂觀。大家從股市恐懼指標VIX指數連日回落，由幾日前嘅超過21點，跌到昨日嘅18.85點，可見一斑。
雖然歐洲央行周四才開會決定是否推出QE，杜瓊斯新聞已經爆料話，據兩名有份參與制訂相關政策的官員表示，執行委員會已提議每月注入500億歐元的寬鬆資金，由今年3月到明年12月，即總額有1.1萬億歐元（約1.27萬億美元），比流傳的5000億歐元高。
這個規模比美國的QE1及QE3都低，QE1係1.725萬億美元，而QE3係1.613萬億美元，但高過QE2的6000億美元。對於上述爆料，歐央行未有表態，該行貨幣政策委員會由昨日開始開會，今晚（星期四）至有決定，期間或者會有修訂，要到真正掀盅時至知。
至於市場收唔收貨？有美股分析員認為，市場期望一個火箭炮式巨大計劃，有另一個傳聞話每月放水500億歐元的計劃只會維持一年，即總數只有6000億，咁就太少啦，消費漏出街，原本升緊的德國股市，馬上調頭回落；而歐元兌美元則由跌轉升。反映市場對於歐央行如只泵水6千億一年，不會收貨。
歐洲股市在市場期望歐央行推出QE下已升上7年高位，有人趁QE正式出爐沽貨獲利，又好正常喎。事實上，歐央行對於市場對QE嘅反應亦好緊張，奧大利歐央行官員Ewald Nowotny昨日便叫投資者唔好歐央行嘅決定過於興奮，想出口術去為市場情緒降低。我有少少擔心到公布時發現唔係火箭炮計劃，咁金融市場就有負面反應啦。
美股昨日早段比較反覆，尾市回歸平靜，輕微造好收場。杜指漲39點，收報17554點；標普500指數升10點，收報2032點；納指升13點，收報4667點。
油價暴跌，已經令到唔少採油公司經營陷入困境。昨日，澳大利亞礦業巨頭必和必拓宣布，計劃將美國頁岩油井的數量由26座削減至16座。另外，美國的石油巨頭道達爾及埃尼公司亦宣佈將削減投資。石油巨頭公司齊齊話會削減投資，紐約原油價格昨日反彈2.8%至每桶47.78美元。美股近兩日回穩，除咗之前跌得太勁，已經出現超賣，其中一個原因係紐約油價近期由每桶45美元至48美元之間穩定落嚟，對能源板塊起咗一定穩定作用，能源股由低位反彈，對美股大市造成一定支撐作用。
陸羽仁
回應(3) 我想回應
陸羽仁 BLOG 舊文
