魚樂無窮：佳景反擊好戲在後頭
■佳景現價低殘，絕對係蔗渣價錢燒鵝味道。 資料圖片
彈弓越壓得實，反彈力就越大，呢個係五歲小朋友都知嘅道理。股市亦然，一個板塊長期有壞消息充斥，只要有些少好消息滲出，即足夠上演醜股大翻身。阿爺貪、限制強國人入境、銀聯卡交易設限等等，拖累賭收歷史性出現倒退。濠賭股由天堂跌落地獄，唔少基金舊年都係衰喺呢個長勝板塊。
噚日花旗出report，估一月賭收有二百四十億澳門元，按年雖倒退16%，但較該行估計嘅兩成為佳，觸發濠賭股谷底反彈，銀娛（027）同埋金沙（1928）由龍變蟲。究竟今次反彈係一日貨仔，定係陸續有嚟，唐牛傾向樂觀，事關農曆新年臨近，市場又會唱好賭收表現，加上估值由燦爛歸於平淡，升多一兩棍挾下淡倉都好合理。
今日推介主力做澳門餐飲及手信嘅佳景（703），估值同樣殘到冇朋友。根據彭博綜合券商預測，今年預測市盈率僅8.8倍，較同業大家樂（341）及翠華（1314）平均嘅23.2倍，折讓62%。秤身家，佳景市賬率1.6倍，較大家樂及翠華平均嘅3.8倍，折讓58%，殘上加殘。
唔好忘記，佳景早前儲夠彈藥揮軍橫琴，連增長潛力都有埋，絕對係蔗渣價錢燒鵝味道。噚日大彈14%，仍較舊年高位低六成，呢一次絕地大反擊，睇嚟好戲在後頭！
唐牛
https://www.facebook.com/tongcow88
唐牛
魚樂無窮 - 唐牛 舊文
