中環迷你裙：渣馬的最大輸家
■渣馬每年都好受歡迎，但體育用品商邊個最執輸？反而可能係贊助渣馬的特步。 資料圖片
渣馬每年大把嘢睇，除了P字運動品牌釀成公關災難，adidas和Nike其實做得唔錯，十公里明星隊幾近俾adidas獨食，全馬的丁子高、肯亞徐等人清一色Nike，最後曝光率最多都係佢哋，贊助費用得其所，咁邊個最執輸？咪就係已是連續三年贊助渣馬的特步（1368），見報率真係低到睇唔見。呢啲咪就係軟實力，即係品牌溢價囉！
點解大陸又做唔到？Sam認為是大陸品牌太急於求成。幾十年前香港呢個山寨工廠夠俾全世界鬧爆，家陣大陸走出來買嘢，要建立品牌，同愚公移山冇分別。當然有人識走捷徑，先扮外國品牌，再用質量贏人心。今日推介的衍生（6893）就是一例，旗下自家品牌美肌之誌，用唔鹹唔淡廣東話配音的電視廣告，不斷loop下成功令人認為呢間係日本嘢，事實上係土炮。
閣下如果唔熟呢個品牌，可以問下身邊的女士，因為就算冇用過都起碼喺化妝品舖見過。由面膜開始，發展到cc cream、防曬、護膚品都有，勝在價錢相宜。由於自家嘢令衍生享有58.4%的高毛利，中期純利逾二千萬元，雖然按年輕微減少，但其實前景無限，因大陸市場佔僅10%，一旦能夠成功滲入大陸市場，營業額翻幾番不是難事。大股東至今揸足75%，經過三個月收集至今仍是潛水價，家陣追入具值博率，保守點博四成好了。
Samantha
https://www.facebook.com/stocksamantha
本欄逢周三、五刊出
Samantha
中環迷你裙 - Samantha 舊文
