一周三件：哈電隨時翻身
■吳偉章任總經理的哈爾濱電氣，係超級現金牛，加埋個超級殘價，值博率高。 資料圖片
哈爾濱電氣（1133）現價同2008年10月金融海嘯當月收市價相差無幾，手頭嘅現金逾百億元人仔，超過總市值，喺核電股當中，殘到不得了。
哈電去到去年6月尾，揸現金125億元（港元．下同），集團股價係貼近八年底，總市值66.8億元，現金係總市值近兩倍。又就算扣埋借款、欠結控股公司借款，同債券債項80億元，哈電仲有淨現金45億元，超級現金牛，加埋呢個超級殘價，真係再跌有譜。
價殘值博率高
又哈電家陣得0.4倍PB，場內行家，東方電氣（1072）同上海電氣（2727）1.2倍PB、中廣核美亞（1811）1倍，祖國中核科技（深000777）係去到10倍！核電比起行家，起碼平咗60%。
哈電股價咁殘，相信同集團半年度成績單，盈利大倒退64%，到得番1.4億元人仔，好有關係。但呢期成績單，哈電錄到交易性證券公允值虧損1.38億元人仔（上年同期錄到收益7,350萬元），證券公平值影響，搞到冇運行。
但要咁睇，喺下半年打後，特別係祖國股市好似一支箭咁，對哈電手頭證券組合，點都有幫助。再講，睇本業核電瓣數，阿爺開番綠燈，陸續批復核電項目。而據權威戰略管理機構Roland Berger預測，到2030年，全球核電機組會增加54個或26%，而當中，有過半數係喺祖國。哈電係祖國核電領導性企業之一，祖國核電市場未來好景，哈電有大條翻身嘅道理。
又哈電海底價，相信冇乜邊隻國企似得哈電咁殘，水向下流，博資金一路向下炒，買哈電，現價（4.85元）博上番近三年密集區6蚊水位計，要升近24%，PB都係得0.53倍，實情未有耐追到上邊任何一位同行。
錢雋
細價股專家
本欄逢周二、三、五刊出
錢雋
一周三件 - 錢雋 舊文
