中環在線：三個月內 買完巨鑽又買屋仔
大劉拎七億鳩嗚
■劉鑾雄用三億買鑽石心頭好，四億幾買到靚屋仔，勁過大富翁！ 
要講城中最鍾意鳩嗚（shopping）嘅富豪，華置（127）大股東劉鑾雄（大劉）肯定係數一數二。佢舊年底喺拍賣場拎超過三億元買兩粒巨鑽畀紅顏知己呂麗君個女後，最近又拎四億二千萬元買白加道31號一間屋仔，三個月內拎七億元鳩嗚，對佢嚟講應該濕濕碎。
呎價登上最貴洋房第二位
大劉嘅購物清單種類繁多，愛馬仕Hermès、巨鑽、靚車牌、知名藝術品、屋仔等等，全部佢都啱，呢度都未計佢舊年以過百億元向華置買入包括尖沙嘴The ONE等多項物業。
土地註冊處最新資料就顯示，劉鑾雄上月底以私人名義登記，斥資四億二千萬元買入白加道31號D屋。佢呢單交易都好巴弊㗎，成間屋超過三千三百平方呎，另外有三千幾呎花園連私家泳池，呎價要十二萬六千五，登上全港最貴洋房第二位，僅次於山頂普樂道十號（天比高）呎價十三萬元嘅紀錄。
白加道31號有四間屋仔，大劉本身已經擁有A屋，聞說，大劉一直想買埋隔籬間B屋，B屋係由英格蘭球會伯明翰前班主楊家誠持有，因被指洗黑錢，B屋淪為銀主盤，事情發展卻峯迴路轉，傳聞楊家誠自己買番呢間屋，搞到大劉買唔到，可能因為咁就轉買D屋喇。
D屋原業主係理文造紙（2314）太子爺李文俊同母親李黃惠娟，佢哋二○○七年以一億七千六百萬元買入，持貨七年幾，賬面賺二億四千四百萬元。話時話，臨近情人節，唔知大劉買入呢間屋仔係咪送畀人㗎呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
