異動空間：九厘股息何處尋
炒開股票會知，波幅大、股票大跌都唔驚，最怕無方向，趨勢未現只有等，而對於日日落場搏殺的戰友，等待是最痛苦的，但家陣個市可遠觀而不可褻玩，誰手痕買啲轉頭就中伏，每日捱一刀好快埋單。
不妨將鏡頭拉遠一點，只著眼於大趨勢，暫時有兩個：一、阿爺料繼續減息降準，谷旺A股救經濟，金融、基建股仍是穩膽，少少波幅等於激勵，早排買咗中資股坐緊艇，畀啲信心，會返家鄉的！二、資金避險打防守波，流入公用、電訊、REITs等高息股。不過，長建（1038）喪升後，股息率跌穿三厘，中移動（941）、領匯（823）亦由接近五厘跌至三厘，三者息率均跌至三年新低，現價唔多值博，最多候低吸納。
高息股買少見少，翻箱倒籠，俾魏力搵到隻白馬戶外媒體（100），剛公佈全年業績，連特別息派0.71元，折合股息率8.7厘，去邊搵？六月先除淨，買定博股價再升，好大機會財息兼收！睇番純利增長兩成，唔算超強，但勝在手揸十億元現金，佔市值四分之一，扣曬負債仲有找，財務穩健，最適合用作避風港。
魏力
http://www.facebook.com/2012jason
魏力
異動空間 - 魏力 舊文
