魚樂無窮：發掘新一代基金愛股
■奧普集估值平、增長勁、派高息於一身。圖為集團主席方傑。 資料圖片
悶股金利來（533）憑高息創五十二周新高，正所謂橋唔怕舊，最緊要受，今日繼續向呢個方向出發，最新佳麗係奧普（477），名字可能較陌生，但卻非池中物，大有機會升呢做基金新寵。
奧普主要喺內地設計及產銷、集取暖、照明及通風於一身嘅浴霸，已有超過廿年歷史，數字顯示，奧普喺浴霸銷量連續十三年第一，市佔率超過七成，實力明顯比對手高幾班。點解咁犀利？秘訣之一就係懂得保護自己；公司擁有已受理及授權技術專利共二百五十六項，成功擊退抄襲商家，難怪近幾年毛利率貼住五成，利錢豐厚。除浴霸產品外，公司仲提供家居設計一條龍服務，務求將產品成功融入客戶屋企，窩心指數達十粒星，更成為最新引擎，中期收入增長達41%。
講完主菜，甜品亦唔失禮。公司上市以來年年派息，極之慷慨，現價息率超過五厘，作為一隻增長股，吸引程度更勝公用股，配合強勁現金流及有淨現金揸手，肯定長派長有。睇番盤數，奧普中期盈利按年增長一倍，速度快過印銀紙，全年盈喜已發，保守估計下半年盈利維持，全年每股盈利達0.14元人仔，市盈率將降至單位數。奧普集估值平、增長勁、派高息優點於一身，最新市值只得十七億，啱曬基金口味，仲要零蟹貨，實在諗唔到唔入場嘅理由！
唐牛
https://www.facebook.com/tongcow88
唐牛
魚樂無窮 - 唐牛 舊文
