中環在線：
中電小股東睇廠說舊事
■中電唔少小股東好期待出席一年一度參觀活動。 張柏基攝 
上市公司照顧小股東，多數係派高息或者喺股東會請小股東食餐好，好少好似中電（002），每年請二、三千名小股東參觀電廠或其他設施，仲要每團都有一名管理層帶隊，甚至會遇到老闆米高嘉道理帶隊。上周六情人節就由中電企業發展總監莊偉茵帶隊去參觀龍鼓灘電廠。
中電自二○○三年底開始，每年十一月至第二年四月，都會舉行超過七十團小股東參觀團，每團有三十至四十人，每年參觀不同項目。
上周六呢團約有三十名小股東參加，多數有番咁上下年紀，好多都見證住中電與香港社會變遷。佢哋一圍埋睇歷史展板，就好興奮咁指住上面嘅相片話「以前真係咁，冇電視睇，要去涼茶舖先有得睇㗎！」
靠「孤寡股」收息養老
佢哋又將紅磡鶴園嘅燃油發電廠（一九四○年投產，九十年代重建為海逸豪園）掛喺嘴邊；離遠隔住玻璃睇渦輪機時，更似懂非懂咁研究，認真聽工程人員講解，可見佢哋對中電充滿感情。
其實好多小股東已經持有中電多年，個別喺中電三十蚊時買入，即係話至今已經翻一番，不過佢哋最鍾意中電派息好（息率接近四厘），大讚「一年有四次派息，好好㗎」。
莊偉茵甚至形容中電係「孤寡股」，意思係唔少公公、婆婆揸住中電股票幾十年，「有啲係由阿爺年代開始揸住，即使老伴過身，都靠呢隻股票定時派息嚟養老」。
中電小股東入面亦開始出現第二、三代，今次就有一位跟隨父母出席參觀活動嘅中大一年級女同學，參觀後，佢都話要買中電股票做股東。可見中電除咗畀到股東成績、股息，仲有一份人情味。
小股東尖銳問題夠專業
唔好以為中電（002）一班年紀有番咁上下嘅小股東，只係柴娃娃當去新界一日遊咁參觀電廠，佢哋知道有管理層帶隊，都諗定尖銳問題，全部都同中電嘅生意同發展有關，好有質素㗎。
有位小股東見上海老家早已安裝智能電錶，可以記錄住戶每段時間嘅用電量，反而香港仲未有，於是提出疑問；莊偉茵亦有準備，指部份工商業區已經有用，希望喺新建住宅開始安裝。
亦有小股東提意見，指本港電動車發展迅速，如果中電加以投資，對公司有好大幫助咁話。莊偉茵回應，中電有留意呢個趨勢，「我哋今年會擴大充電站，中電𠵱家有過百個充電點，約走二十公里就可以充電，今年會再加，仲引入新插座，等唔同制式插頭都可以用」。嘩，管理層果然要做好功課先可以帶隊。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
