魚樂無窮：中生聯合爆升有道理
■中生聯合業績後連升四日。圖為集團主席桂平湖。 資料圖片
李克強喺兩會記者會大派定心丸，直指保七冇難度，又力撐網購、房地產同金融體系，A股三扒兩撥上番3400樓上，睇番二○○六、二○○七同二○○九升市年，兩會後一個月隨時有兩位數升幅，睇牌頭，今年好大機會歷史重演。
中生聯合（3332）業績後連升四日，累積升幅達46%，看似誇張，但仔細睇番盤數，其實又好合理。公司主要喺中國產銷營養膳食補充劑及保健食品，食正強國人中產化，最新業績亦交足功課，全年賺1.1億人仔，增長52%，睇埋派息，驚喜打孖上！末期息連特別息共派11.93分，相當於九成二利潤。雖然升咗一浸，現價計息率仍達六厘，有升有息去邊度搵？
公司零售網絡覆蓋十七個省市，包括中生品牌零售店及康培爾品牌零售店，另設有網店，更已與大型企業及銀行開發微信支付及合作平台，網上網下通吃。數據顯示，內地健康產品購買力已逼近萬億，但實際銷售額不到三千億，錢途無可限量，再講，中國相關消費支出僅為美國嘅5%，強國崛起下，呢個餅肯定發大嚟搞。
中生聯合H股市值六億唔夠，炒味極濃，睇真啲，原來熱炒股康健國際（3886）係股東之一，火上加油格！後者市值一百五十億，係中生聯合嘅二十五倍，唔覺意有合作或併購風聲，中生聯合大茶飯也，趁回吐分段吸納，中線博見三字頭。
唐牛
https://www.facebook.com/tongcow88
唐牛
魚樂無窮 - 唐牛 舊文
