中環在線：唐家成又抱孫
自誇唱歌𠱁細路好叻
■唐家成一講孫仔孫女就笑曬。
證監會主席唐家成下個月復活節將會好唔得閒，佢唔係要周遊列國四圍走，而係要留港湊孫，事關佢女兒舊年底生多一個bb仔，加埋兩歲幾嘅大孫女，唐家成要幫手湊住兩個寶貝孫，分分鐘仲忙過退休之前。
唐家成噚日跟傳媒食晏，一講到上個月農曆新年做過乜，嚟緊復活節又諗住去邊度玩，佢就笑笑口咁自爆，話啱啱多咗粒三個月大嘅孫仔，孫仔嘅英文名叫做Lucas，加埋兩歲幾大嘅孫女Sophia，正好湊夠一個「好」字，認真要講句：恭喜曬！
■唐家成（前右一）嘅千金（後右一）係靚女，仔女一定好標致。 女兒誕男B湊個好字
唐家成一講孫仔孫女就笑曬，仲好得戚咁話自己湊孫好叻，佢會唱歌𠱁佢哋瞓覺，不過佢就唔肯講佢嘅首本名曲係乜東東。
唔講唔知，唐家成嘅太太係英國人，阿女就嫁咗一位外表似歐洲人嘅黎巴嫩人，換言之，佢一對寶貝孫就有一半黎巴嫩血統，四分之一中國同埋四分之一英國血統嘞。咁嘅組合，長大後，肯定係靚仔、靚女喇。
唐家成除咗係證監會主席，仲係體院同英基主席，照咁睇，佢喺體育界同教育界都應該識唔少人，將來孫仔孫女讀書或者要發展邊方面嘅體育運動，應該都易過借火。
不過又咁講，唐家成雖然識得人多，二○一一年退休前做到畢馬威會計師事務所亞太區主席，計數都肯定難唔到佢，但佢竟然唔識得上網認購滙豐百五周年紀念鈔呀。
滙豐紀念鈔本周六截止認購，唐家成話，一早有興趣買，但之前攞唔到申請表，於是就放棄咗。佢知道可以上網申請，但以為手續繁複，加上佢唔係諗住買兩萬四蚊最貴嗰款，咁就費事搞，不過噚日當佢知道網上手續簡便，佢就話會返去試試咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
