趣BLOGBLOG：根本就冇股神
過去一周，網上財經討論區最多人談論的，是一名據稱由12歲開始炒股，炒到今年24歲，身家已經有8位數字的「少年股神」。網民質疑，「少年股神」連第一隻買的股票都唔記住，發達靠入Excel，係咪堅先。
入Excel可發達
姑勿論肥仔主角是否憑本身實力炒到過千萬，但由網友留言，有件事可以分享。首先，入Excel就唔可以發達嗎？天下沒有免費的午餐，每件事，沒有準備做功課，嚇嚇見股票急升就狗衝，贏係夠運，輸係應份。
股票本身是件沉悶的事，尤其是要賺大錢，根本上強迫自己學識捱悶，不看短期股價波動。
由數十年數據中，你會發現股票的慣性趨勢、由蛛絲馬跡中，發現當中的異常。很多網友都忽視昔日數據，「過去嘅嘢，仲有價值咩」，因此要他們入Excel、做統計，大都嗤之以鼻。
周星馳喺電影食神曾講過一句話：「根本就冇食神，或者人人都係食神，老豆老母、阿哥細佬、條仔條女，只要用心，人人都可以係食神。」
同一套論理，這個世界根本就冇股神，畢菲特嚴格地來說，是hold神及buy神，手上持有的可樂、運通以及強生等等，死揸三四十年唔放，大家會有如此耐性嗎？
事實上，每逢被傳媒稱為少年股神或者街坊股神，越高調，越死得快，真正的股神，低調是王道。炒到超過千萬身家，有真材實料的，都收收埋埋益自己，邊會益你哋班契弟呢。
長和跑出大熱
港股今年乏善足陳，但識得揀，仍然可能跑贏大市幾條街。五十隻藍籌股中，每年總有一兩隻升幅勁到你唔信。去年大市升1.3%，恒地（012）飆35%；2013年恒指升2.9%，銀娛（027）升129%；2012年港股升22.9%，新世界（017）升92%；2011年港股跌20%，聯通（762）升46.9%。
今年迄今，恒指升3.4%，最標青的藍籌是騰訊（700），升27.6%，然後是長和（001）及和黃（013），同約16%。如果要揀邊隻年底跑出，我揀長和。原因，我入了Excel。
股榮
https://www.facebook.com/stockwing1
本欄隔周三刊登
股榮
趣BlogBlog - 股榮 舊文
