中環在線：前主播蔡雪瑩離開安永
唔做公關 接拍廣告做司儀
■蔡雪瑩唔做小花同公關，都仲有好多嘢想試喎。
大台嘅新聞小花一個接住一個走，其中一位小花蔡雪瑩（Snowy）舊年亦轉戰財經界，走去四大會計師行之一安永(EY)做公關，但係做咗半年，佢就另有計劃，今日已經係佢喺EY嘅last day。Snowy諗住將來向司儀、拍廣告、演員等方面發展。
自由身接job搵真銀
28歲嘅Snowy舊年10月離開大台就加入EY，其間EY爆出員工登報鬧高層呢單中環熱話，不過Snowy當時冇直接負責處理呢件事。家陣佢做咗半年就講拜拜，唔通由新聞小花轉做公關真係咁難適應？
Snowy解釋，唔係唔慣做公關，佢跟自己部門嘅同事亦都相處融洽，只係因為離開大台之後，有唔少廣告同埋公關界朋友叫佢試嚇拍廣告或者做司儀，佢見到機會湧至，所以就想趁後生兼且冇家庭負擔，接受新嘅挑戰。
佢承認，喺大台做咗四年幾主播，的確累積到知名度，即使𠵱家冇再出鏡報新聞、報天氣，但係出到街都仲有唔少路人跟佢打招呼，佢都覺得好開心。
除咗做司儀、拍廣告，Snowy不諱言，如果將來有電影公司搵上門，而導演又唔嫌棄佢起步慢，佢都會想嘗試做演員。不過，佢暫時都係想做企業、品牌或者新股發佈會司儀兼拍嚇廣告做起步先。嚟緊佢仲會幫醫院做訪問兼出書。
冇全職工作在身，以自由身接job係咪搵到真銀呢？佢就話冇認真計過條數喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
