唔睇西風
2015/04/02 08:36:49
網誌分類: 經濟
中國股市顯著反彈，歐洲股市亦造好，但美股受到疲弱的經濟數據拖累，繼續下滑，周一的升幅，已經已經全盤清袋。杜指收市跌78點，報17698點；標普500指數跌8點，收報2060點；納指跌21點至4880點，杜指期貨繼續向下，比現貨低水83點，睇嚟大市仍未跌完。
美元匯價回落，油價亦反彈上每桶50美元樓上，能源股反彈，但美股仍然止唔到咳，美國10年期債券息率亦下滑，跌至1.856厘，反映資金由股市從入債市，主要原因係昨日公布的經濟數據令人失望，除了美國3月製造業指數從52.9%下降至51.5%，低過預期，且係連續第五個月下降，增長速度更下降至近兩年來最低水平。另外，新訂單指數從52.5%下降至51.8%。在ISM報告追蹤的18個行業中，有10個行業3月份的業務擴張，7個行業的業務出現萎縮。
更惹人關注的是就業狀況，3月ADP私營部門就業人數增加只有18.9萬，遠少過市場預期的24.5萬人，係去年1月以來最少。ADP就業數據通常被視為隔一天公布的非農就業數據的先行指標。令市場憂慮非農就業人數增長可能好嚇人。市場現時普遍預期3月非農就業人數增加25.2萬，較2月份的29.5萬有顯著下降。
美國近期出爐的經濟數據都唔係幾得，房地產市場唔掂，日前公布的零售支出放緩，汽車銷售下滑，工資冇增長，好多企業發盈警，在在顯示經濟增長放慢。眾多的經濟範疇中，惟一係勞動市場，好似同疲弱的經濟絕緣咁，人跌佢升，失業率不升反跌，2月份的非由就業增長人數更創出多年高位，令到市場擔心聯儲局因為勞動市場狀況得到改善而開始加息。
昨日出爐的ADP就業數據遠差過市場預期，就令市場開始憂慮惡劣的經濟狀況可能已經蔓延至勞動市場。Lord Abbett的分析師指出，ADP報告指出生產部門的工作由過往平均增加3萬個，銳減至只有5千個，主要後不斷升值的美元令到大公司盈利受損，所以減少增聘人手。所以，強美元效應這個影響亦會反映在非農就業數據上。
市場關注周五公布的非農就業數據，以借此推測聯儲局的加息時間。如果職位增長數字遠好過預期，預視聯聯局可能最快會在6月加息，現時市場預期儲局最快會在9月才加息，昨日的ADP就業數據強化咗呢個睇法。
不過，有經濟學家指出，隨著企業盈利可能係6年以來第一次下跌，整體的經濟數據又唔得，壞消息（勞動市場唔得）可能唔再好似以前咁，可以當好消息（聯儲局唔提早加息）炒，畢竟，除了聯儲局提早加唔加息以外，企業有冇盈利，即係經濟得唔得，都影響住個大市走勢。
我覺得美股上高位後，愈來愈難炒，有少少由上升市變為上落市的感覺，可能同資金外移炒歐洲股有關。畢竟在一個步向加息的經濟中，股市已經唔似在不等放水的零息市咁好炒啦。香港而家無嘢諗，美股唔得唔緊要，睇住大陸做人，西風唔得等北風啦。
陸羽仁
回應(9) 我想回應
陸羽仁 BLOG 舊文
