中環在線：記者、Model快絕跡？
業界齊反駁 琦琦：有衫就有模特兒
■網上熱傳《消失的十種職業》文章，記者打入十大。
打工仔返工唔止要打醒十二分精神，仲要有危機感。噚日網上熱傳台灣《生活文摘》一篇文《消失的十種職業》，列出十大最快消失嘅職業。唔好以為唔關自己事，中環嘅擦鞋檔、打字
員同接線生，逐樣消失。篇文提到十大瀕臨絕種嘅職業，最高危係記者，第二高危係銀行櫃位職員。
記者值錢在「有料爆」
話記者高危，文章解釋美國有公司結合大數據與人工智能，利用軟體發展範本、框架和演算法，撰寫過百萬篇報道。揸筆搵食嘅華華，即刻搵記協主席岑倚蘭傾嚇。喺傳媒行業有三十幾年經驗嘅岑倚蘭話有乜好驚，話記者最值錢係「有料爆」，報道精采內容。岑倚蘭話曾經有人講過電視台出現，電台就會消失；有互聯網，報紙會執笠，但電台同報紙咪一樣喺度，只係黃金時間已經過咗，「資料性嘅報道，當然唔夠機械人快，但係由記者所做嘅採訪、分析同文采，機械人係取代唔到」。
另一樣面臨消失威脅嘅職業就係銀行櫃位員，華華又向Banker八嚇，的確越來越多客戶用電子平台，令銀行櫃位職員數目少咗。但現階段銀行始終需要有前枱職員，同客仔面對面做交易，所以短期內呢個職業唔係話冇就冇。
至於同屬高危的模特兒，業界都唔認同。名模琦琦話只要有時裝就會有模特兒，呢個係互相依存嘅行業，除非唔再有衫，否則模特兒係唔會消失。
至於Jessica C.就話，模特兒係講求個骨架，現今科技呢方面都仲未可能整到。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
