女神tea time：有後台的重要性
■中國新城鎮早前引入國開行為大股東。圖為集團副主席兼執行董事施建。 資料圖片
懷仔非法匿港九年，先獲行街紙，後將有書讀、有公屋。有人話問題唔喺懷仔度，佢做順利邨技安係因為身世可憐，冇管教下自己曳；畀佢留港係出於人道立場。誠然，千錯
萬錯都唔係佢嘅錯，所以請注意，大部份人嬲唔係因為佢係內地人，而係香港制度嘅缺陷帶來雙重標準。
點解有工聯會做後台就可以酌情處理，如果佢唔係內地人，而係中東、非洲等，又有冇得留低？本來呢個問題，都冇分藍黃絲立場，但我哋嘅特首，就殺出嚟話覺得大家不滿只因懷仔來自內地，成功叫藍絲歸邊，屈黃絲對人偏見，又再次乘機抽水分化港人，懷仔單嘢，即使可以留喺香港，都可以做輸家，但特首無本生利搵著數就肯定係贏家。
懷仔事件重提有後台嘅重要性，揀股都一樣。中國新城鎮（1278）早前引入國開行為大股東，後者持股69.22%。
阿爺積極搞城鎮化，國開行又係其中一個推手。集團主力發展一級土地，佢泊埋國開行就好似懷仔搵到嫻姐一樣，得到阿爺特別照顧，後台咁大買嘢返來博佢有動作非空穴來風。更重要係分拆集團出嚟嘅上置（1207）自4月後爆升，累積升逾倍。中國新城鎮最近先開始見形成上升通道，喺同系效應下，加上上升通道已形成，相信隻股隨時開車。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
