魚樂無窮：黛麗斯畀你雙重驚喜
■黛麗斯最新中期盈利1,602萬元。圖為集團非執行董事馮煒堯。 資料圖片
期指結算日，A股大玩變臉，由蓄勢突破5000點，變為下試4600點，港股亦要陪跌626點，驚嚇指數達十粒星。「連匯金都沽內銀喎，係咪見頂喇？」相信唔少散戶都有呢個疑問，加上A股日日
成交二萬億，泡沫濃度極高。唐牛就覺得大牛市唔會直線上升，過程中必有起伏，一日阿爺唔判死刑，一日個市都仲有得升，唔係乜嘢叫政策市呀？所以，大牛市喪跌應該開心至係，畀機會你入場喎，仲想點呀？
跌市下炒風依然旺盛，疑似殼股中華國際（1064）及績優股奧思（1161）有雙位數升幅，今日推介嘅黛麗斯（333），有齊上述兩大元素，無論炒A餐抑或炒B餐，都啱曬市場口味。
黛麗斯主打女性內衣設計及產銷，近年業績大翻身，最新中期盈利1,602萬銀，爆升九成。「舊年下半年賺2,862萬喎，擺明倒退啦！」睇真啲，期內出售屯門小型貨倉，錄得1,850萬特殊收益，所以盈利明跌實升，毛利率向上勢頭亦持續。保守估計下半年盈利再升兩成，預測市盈率為14.7倍，比起強國品牌都市麗人（2298）嘅23.9倍，平足一條街。扭虧後亦恢復派息，就算唔計去年特別息，現價息率都有4.4厘，有分加！從殼股角度睇，市值5億唔夠，三大股東持貨逾五成，仲較NAV有折讓，流曬口水！大時代下靜靜地向上攀升，派對有排未完。
唐牛
https://www.facebook.com/tongcow88
唐牛
魚樂無窮 - 唐牛 舊文
