金手指：有渠道但無心做
■向心任主席的中國趨勢，據稱在內地有五網合一及衞星頻道。 資料圖片
上周初，曾榮登本報A1頭版、仲要兩次（一次因地鐵生擒縱火狂徒，另一次就同佢當時女友發生咗啲事）嘅季詩傑喺facebook約我食晏。嗰日到餐廳，帶位到function room，我一推開門望就呆一
呆。除季詩傑之外，仲有有線娛樂前阿頭徐小明導演，同埋真係幾靚仔嘅前亞視執行董事盛品儒。
中國趨勢唔知龍定蛇
我哋幾個人坐低後，季詩傑就話：「孫柏文，今日有個故仔想畀你知。」佢一講，我就伸手轉桌上轉盤，手向碟前菜答：「以今日咁嘅卡士，真係要攞定碟花生慢慢聽。」原來，佢哋係本欄fans，知道我對資訊科技、傳媒有好多意見，所以嗰日就搵我傾。咁佢哋亦係中國趨勢（8171）度做緊董事，同我話佢哋喺大陸有咩五網合一呀，咩獨家資訊發放渠道，例如衞星頻道。而我之後做功課，佢係有啲咁嘅渠道，不過唔知龍定蛇。大家睇開我嘅專欄，都知你有乜網物網、咩獨家渠道，我都深信最終係互聯網世界（光纖、4G玩曬）。所以啲獨家渠道就算而家有價值，他朝都會被互聯網侵蝕到唔值錢。
你睇香港電視（1137）股價就知，就算他朝互聯網玩曬好，每次好似有機會用傳統電視播放，股價就升。而喺大陸呢啲資訊流通有限制嘅地方，你有官方認可資訊渠道，就可以進行屈機搵錢。講真，中視金橋（623）營運模式都係靠呢招。
但你睇亞視收場，都知就算有官方認可渠道，無心經營，都會死得好慘。睇中國趨勢啲通告新聞，進展慢到嘔。我只可以溫馨提示啲董事兼主席向心，你哋手上嘅資訊發放渠道要盡快上馬攞嚟用，仲要有心有力咁經營。雖然最後多數燒完銀紙得個桔，現在唔全力做，好快發現啲渠道已達無用之地。到時就算只係想攞來當故仔捧股價都會冇人信。表面證據就係咁，不過究竟故仔真係點？唔知。所以點升，佢嘅股票我唔會掂。唯一會買，只係花生，等睇呢個惹火卡士做乜戲。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
