癲炒抽水
2015年05月05日
匯豐中國4月PMI終值差過預期，投資者憧憬經濟弱或觸發人民銀行進一步減息，令港股全日反覆，一度跌過百點後回升，最終恒生指數微跌收市，不過炒股仔熱潮就繼續升溫。
股仔近日喪炒，不少都開始有動作。證券概念嘅南華金融(619) 早前停牌，宣佈供股後昨日
復牌，但股價無因為抽水下插，反而彈升咗。
南華金融供股炒上
根據南華金融公佈，抽水計劃為二供一，供股價為0.1元，較停牌前折讓42.53%，集資總額2.5億元，用以擴展業務及營運。公佈後復牌股價卻反而彈高三成。
證券股近排當炒，南華金融卻必然宣佈供股。有中環茶友話，集團復牌前市值得八億元左右，若然真係要錢，不如等股價炒高三扒兩撥集資好過，使唔使搞到供股咁複雜呀？
睇番呢間公司，去年中大股東等曾通知，話正與獨立第三方就可能收購作初步討論，雙方仲就該潛在交易簽訂一份合作備忘錄，喺消息刺激下股價一度大升，當時市場仲傳成交價大約八、九億元左右。不過，洽購最後終止咗，股價大插向下，喺市況較為淡靜的日子，曾經每股股價插低過一毫子，諗唔到係?家證券股有價，阿貓阿狗都炒作一番，咁佢又有小小變番天之驕子FEEL囉。
中環茶友話，去年佢洽商售股，當時升到去成十億元市值，以當時殼價只係四、五億元，加埋檔生意，股價已經反映晒利好因素，如果我係有貨嘅炒家，肯定會趁高位沽貨，等佢低位先至吸番，最難估係個市竟然咁快上番去，?家宣佈供股，反而俾高位沽了貨者一個「平價」增值機會，所以佢話抽水，股價反而標高，因為大家就覺得有人想增持或炒作，呢類財技喺?家細價股熱炒下，相信會陸續有來。
細股多人搵食，大股就只能輪流炒板塊。港股反覆，下午A股回升，恒生指數昨日收造28123點，跌9點；國企指數收報14459點，升28點，成交1556億元。
中港地產股 內房值博啲
輪流炒板塊去到地產股，借住本港樓市新盤交投勁，地產及收租股表現省鏡。新世界(017) 上周公佈轉讓酒店予合營，收造10.84元，揚0.54%，為表現最佳藍籌股；新地(016) 升5.3元，造134.4元，恒地(012) 走高2.3元，造64.6元；收租股則炒炒反彈，九倉(004) 飆2.7元，太古地產(1972) 走高0.55元。
同一時間，內地都話樓市有回暖情況，上月中國部份大城市樓價回升，其中北京、上海等一線城市房價按月由跌轉升，二、三線內房股受捧。
中海宏洋(081) 抽高13%，造5.27元；花樣年(1777) 炒高13%，連升多日的恒大(3333) 再抽升7.5%，報7.9元。貨比貨下，內房股值博率始終都係高過香港地產股。
至於一度熱炒的一帶一路，暫時仲要唞氣。借住龐巴迪(Bombardier)表示不會出售鐵路業務，觸發南北車急跌，北車(6199) 造15.02元；南車(1766) 造14.12元，雙雙跌逾5.8%，旗下南車時代電氣(3898) 都下滑4%，造63.7元。
內地影星趙薇趁高位減持阿里影業(1060) 。另聯交所股權披露資料顯示，趙薇場內減持阿里影業股份，每股均價同為3.9元，共套現達9.98億元，持股量由9.18%降至7.96%，證明股票升咗都係食胡着數啲。阿里影業收3.68元，跌4%。
陸羽仁
金融High Tea 舊文
