女神tea time：飛雲，機會嚟啦
■大市噚日雖冇乜睇頭，但拎住毫子股都會幾和味。 資料圖片
雖然大市噚日冇乜睇頭，但拎住毫子股嘅相信會幾和味。上月中推介過嘅幸福（260），昨日亦大陽燭炒上，累積升幅37%。至於同樣上月中講過嘅漢傳媒（491），不但已累積已升逾五成，
噚日更加一度脫離毫子股行列，最高見過1.03元。毫子股炒到癲，所以唔好畀佢停，繼續喺毫子股度搵食。
如果喜愛GEM仔嘅，可望望永耀（8022），剛進行調整，可望破前年高位。另外，今日推介偉俊集團（1013），首先你要了解背後個舵手，亦即大股東係林清渠。佢係一個出色嘅基金經理，係呢行老大哥。由佢掌舵嘅瑋俊投資基金，分別擁有直接投資基金及兩間對沖基金，至2011年底規模超過300億元，市場估計現時規模已去到500億元。
林清渠2013年坐埋偉俊集團主席位，一直執乾淨間公司，目前公司從事生產軟件以及提供解決方案、買賣通訊產品等。1月突然宣佈，洽商向獨立第三方收購或投資一間互聯網技術公司之權益。呢間公司過去幾乎係冇做過咩大動作！突然話要做收購，相信係想大舉進軍互聯網+，仲唔係意味佢要撳掣！今次好可能只係第一步，昨日一支大陽燭，仲要由仙股升呢做毫子股，追入博佢仲有第二、三、四步，咁到時就真係飛雲，機會嚟啦！
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
