一周三件：中國光纖超平
■中國光纖食住祖國需求同一帶一路，已經掂過碌蔗。 資料圖片
中國光纖（3777）唔計新開拓有源光纜，原有光纖連接器呢一瓣，食住祖國需求，同一帶一路，已經掂過碌蔗，預測PE仲係得超低單位數，仲係好抵搞。
花旗國企業Akamai報告，截至上年第二季，祖國互聯網平均每
戶嘅帶寬，喺全球排72位，網速仲係好慢！又另一間Freedonia就預測，祖國光纖需求，會由上年1.38億芯公里，增加22%，到2018年時1.68億芯公里，兼且佔全球需求近48%比重。
祖國互聯網用戶增加，加埋電貿網遊，極速需要擴容同配套升呢，加埋阿爺寬帶國策，keep住為包括中國光纖在內嘅光纖相關配套商提供勁厚商機。
電訊光纖亦是一帶一路其中一瓣主打。睇報道，單係一個土耳其，去到2023年時嘅光纖網絡投資額，就達到600億港元！中國光纖產品，有出口英澳紐，獲得先進國認可，有曬競爭優勢，順住一帶一路走，啖啖肉！
再講，中國光纖瞄準過百億港元規模嘅有源光纜市場，旗下40G同56G有源光纖產品，已經順利投產，加埋呢個新瓣數，業績更加如虎添翼。係咁意估中國光纖今明兩年盈利，keep住上年28%增長幅度，到5.4億元人仔同7億元人仔，就算連埋上年配股同派紅股攤薄計數，明年係6.3倍預測PE，明年PB亦只得0.9倍。
亞洲區光纖瓣數，祖國亨通光電（滬600487）明年20倍PE及2.7倍PB、台灣中磊（台5388）12倍PE及2.6倍PB、馬來西亞OPCOM無預測PE及2倍PB。
中國光纖PE、PB平霸，只係追到最近磅嘅中磊12倍PE，現價（2.58元）講緊升90%，到4.9元！
錢雋
細價股專家
本欄逢周一、三、五刊出
錢雋
一周三件 - 錢雋 舊文
