慢慢來
2015年05月08日
港股A股化，近日市場少咗人關注美股同美息走向。不過，美市連跌幾日，聯儲局主席耶倫話關注股市估值偏高，講法就有啲新意，我喺網誌講咗小小自己嘅解讀，話耶倫隨時係因延遲減息為股市債市降定溫，讀者有興趣可以上去查閱。
美股杜指去到萬八點樓上，阻力真係唔細，雖
然股神巴菲特話仲有更美好嘅事嚟緊，但華爾街老牛難免受聯儲局息口去向影響，好難可以大升。至於中港股市就唔同，最主要係多咗中央對金融市場政策左右。
市好集資 中央之意
最近A股接連回調，主要係受新股大量上市影響，加上監管機構對多了投資者用槓桿買股表示關注。近日股民興講無綫神劇，有中環茶友特別整咗段股神葉天的語錄︰「股市原意，乃讓集資投資有其地，社會向榮，人皆有賺，惜人性貪婪，耗盡心思，巧取豪奪，樂土成煉獄，血雨腥風，殺戮不息，無數人蕩產傾家輸性命，勝者則喪良知人格。」
茶友笑言，中央搞起股市，目的正如葉天所講，係為咗企業融資，社會繁榮，人皆有賺。家好多人話內地債務太重，威脅經濟穩定，搞好股市，就係期望可以把大量債務轉為股權，減低風險，故此股市上升有利融資，當升得急時阿爺放大批公司上市，根本係正常過正常，既係無忘初衷，同時又有降溫作用。換一個角度來說，當個市跌得急時，阿爺就會穩住市況，至於點樣係呢個過程中，避免腥風血雨，茶友話就要睇通股市遊戲嘅本質，同埋靠定力，點樣係跌市時唔好太驚，升市時唔好太貪。
股市由集資之地，變成貪婪煉獄，腥風血雨，皆因一個利字，而散戶大多貪勝不知輸，好似早前內地股市上完4000，上4500，好似仲想開行車去，升得太急必然要回，這是自然定律，散戶唔好話叻到識高位減少少貨，只要識升得太癲時唔好高追，就唔使受跌落來切手指之痛。我昨日講調整未完，今日仍維持呢個調，所以好多朋友問跌咗唔少好唔好補番啲貨，我話情況人人唔同，即使你貨好少想補貨，都唔好太急一注入晒，小心再滑一個坡，三個字︰「慢慢來」，要買都分注慢慢買。
跌市仍有急升之局，半新股恩達(1480) 連續兩日飆升，而且升勢更急，全日飆升逾九成，就係另一場《大時代》現實版喇。恩達昨收報30.1元，飆94%，成交額6833萬元，兩日累計大升212%。其他股仔包括派紅股博搶鏡的博華太平洋(1076) 升勢繼續擴大，現報2.95元，升35%。
恩達是線路板生產供應商，於去年底才上市。集團2014年底止年度約利4420萬元，按年增長11%，現價等如72億市值，去到125倍市盈率，點睇股價都係脫離晒基本因素。對於公司股價急升，恩達連續兩日發公告，話不知悉導致價格及成交量波動的任何原因。
五窮效應 有機低吸
好明顯，佢咁樣喪升法，當然有大戶手影，以佢上市時市值不足10億元，街外貨源流通量只有2、3億元，要收乾根本唔難，但散戶走入去玩，就要識落車啦，散戶要記住即使隻股升到上太空，一日未沽貨未走，都係帳面財富。
個股喪升只係個別例子，由於本周A股IPO凍結2萬億元人民幣，內地股市持續受壓，上證指數收市跌2.8%，逼近4100點，兩市成交是近期首次縮減至不足1萬億元。
港股受累連跌六日，過去六個交易日累計挫1153點。五窮效應顯現，恒指收市已經碌到去27289點，跌350點，有可能試一試兩萬七關口；國企指數收報13768點，跌228點，成交額1616億元，估計大市有可能再跌，不過如果A股有機會去到4000點左右，咁又唔怕買啲喎。
陸羽仁
金融High Tea 舊文
