富貴與閉翳
2015年05月21日
美股升、A股升，港股我行我素，指數軟軟哋，但股仔則有人暴升、有人暴跌，富貴與閉翳並存。
A股昨日雖然延續升勢，但港股又跟唔上，午後內地從高位回吐，股市就跟住回，一度挫超過兩百點，最終收跌108點，恒生指數收造27585點，國企指數收報14235
點，升44點，成交金額1378億元。
減持股腳仔軟
指數雖然回落，大股逐一唞氣，但咁唔係大市嘅完全真象，好多股份呢兩日紛紛爆升，日日有幾十隻創出一年以至歷史新高，有啲炒業績，呢類股通常升得唔係咁多，升得最癲係炒佢有動作賣殼或搞財技。呢類股份無基本因素可見，叫你唔買可能阻你發達，比較穩陣方法係漁翁撒網，低位買啲擺喺度，升時就坐吓順風車。如果想高追，咁就要做定逃生裝置，有乜「依郁」就跳車先！
科網股開始唞氣，騰訊(700) 跌1.7%，質低大市47點，收造158.6元，挫2.8元。多間公司遭股東減持，中國外運(598) 傳被德國郵政減持，全日跌2%；神州數碼(861) 遭股東Sparkling Investment沽貨，收市造挫5%；新華保險(1336) 被機構投資者減持，股價跌1%。
不過呢的都係濕濕碎，比起一直喪炒的巨股漢能(566) 的暴跌，就不算一回事。美國上市的內地光伏商英利綠色能源因為巨額債務問題，在美國大插37%，搞到香港光伏股捱沽，但漢能開市個幾鐘就暴瀉47%，低見3.88元，隨後中途停牌，話等待公佈股價敏感資料，停牌前造3.91元。
港股大時代，特徵之一係A股化，各種奇怪現象，狂升暴跌可以同時發生。之前有隻毒股恩達(1480) 爆到成為紅底股後急插，昨日又輪到谷上成為千億企業的漢能暴挫四成幾後停牌，半日市值蒸發830億元。
漢能呢個股壇魔術玩咗無一年都有半載，好多沽空大鱷唱淡佢盤數，質疑佢有問題，但公司股價愈鬧愈升，搞到班沽空大鱷有啲腳軟。從表面去睇，漢能所做嘅太陽能產品發電成本較貴，有啲市場壓力。須知?家傳統石油能源價格大幅回落，喺頁岩氣開採技術不斷提升下，油價相信難以大幅回升，再生能源市場都承受價格回調的威脅。從本業前景睇，漢能股價唔容易長期企喺高位，佢能夠有咁「不平凡」表現，相信主要係股市裏面有高手大玩財技炒高所致。
咁高財技，局外人好難睇得透，昨日佢急跌，究竟係夾倉大戶收夠籌、抑或係彈藥不繼頂唔順就唔知嘞，總之呢類大戶鬥空軍嘅遊戲，散戶不知就裏，無乜事無謂行埋去，以免成為大鱷點心。反正個市?家有好多股炒，何必走去巨人打交嘅渾水去搏呢？
漢能急插閒人免近
《經濟參考報》報道，內地計劃上調跨境電商進口稅至「合適的稅率水平」。阿里巴巴表示，預計稅率上調後，國際商家會在價格上做出調整，抵銷相關影響。
目前內地海關對跨境電商企業進口，試行的是行郵稅，稅率大約10%，較一般貿易進口稅率低30%左右。
消息指，目前各部門已經基本達成一致，將行郵稅上調到一個合適稅率水平。但考慮到要鼓勵跨境電商發展，稅率仍然會低於一般貿易進口稅率。
有電商表示，行郵稅提高不影響其跨境電商業務。指目前國內消費者購買的海外產品多數稅率為10%，價格在500元人民幣以下，預計稅率上調後，商品價格不會大幅上漲。
阿里就預計國際商家會在價格調整，抵銷相關影響。呢個消息反映內地對網購稅務執正番少少嚟做，短期或者成為網購股調整理由，長線而言，內地網購以內銷對大陸產品為主，影響相信唔係好大。
陸羽仁
金融High Tea 舊文
