智取大市：惠理激發變倍潛力
表面睇，恒指好似好chok，指數成份股好似廢咗武功咁，等極都唔開車，但細價股日日喪炒不在話下，二三線亦大漲小回，值得留意嘅係，只要唔係大跌市嘅日子，上升股份隻數都大約千隻。如果唔睇指數，以升股數目去判斷市況，基本上近期港股算係相當強勁嘅升市。
除咗睇升股隻數
之外，噚日40隻股上升幅度超過兩成，至於跌幅超過一成嘅股份只有5隻，隨機買入波動性大、交投量增加嘅股份，除咗賺錢嘅機會率都高過輸錢之外，股票嘅升幅亦遠遠大過輸錢股嘅跌幅。
呢種炒股唔炒市嘅好日子，大家要好好珍惜，呢一刻無謂畀指數綁住自己。
近排藍籌股走勢的確比較遜色，但恒指圖同港交所（388）拍埋一齊去睇，就發現最近兩個星期，港交所股價一直比恒指更強，理由好簡單，就係港股成交回升。
當恒指仲喺個長方形格仔爭持緊之際，港交所已經做個靚靚杯柄形態，仲要企穩300蚊，睇嚟升浪2.0 version準備起動，港交所好就好在佢個圖表永遠唔呃人，係強就強，少有技術陷阱，可以放心重錘，呢一刻要揀升市穩膽，港交所始終係不二之選。
港交所升得起，理論上惠理（806）都一定唔會差，仲有機會跑贏港交所，近期連續幾日回吐，只不過前排謝清海減持，市場需時消化批貨。
論概念贏港交所
睇番當時謝清海手貨用每股16.34元掟出，當時只係折讓5%，反應相當唔錯，反映大戶要接謝清海手貨亦驚都未驚過，貨落強者機會大。而家股價跌破咗配股價，消化咗配股沽盤同獲利盤之後，只要港交所向上推進，惠理一定唔會食塵。
論上升潛能，惠理的確比起港交所更值得憧憬，皆因規模細、戰績彪炳嘅名牌港股基金寥寥可數，中港基金互認之後，惠理最有條件有同內地其他金融機構合作，配合未來內地市場逐步開放，惠理攻內地嘅生意肯定越做越大，以內地人資金實力計算，長遠收入應以倍數上升，姑勿論嚟緊港股仲有冇得大升，論概念惠理已再贏港交所幾條街。
論缺點，唯一真係謝清海減持打擊市場信心，但晉佳信市況夠曬癲，散戶可以暫時打贏謝清海。噚日惠理股價係配股後首日出現陽燭，小時圖就率先突破保歷加通道中軸嘅阻力，已經擺脫弱勢，1個月內博見20蚊。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
