魚樂無窮：靚殼逆市破頂要尊重
■《大時代》重播尚未大結局，中港股市率先出現奇蹟日。 劇照
《大時代》重播未大結局，中港股市率先出現奇蹟。A股最多跌5%，埋單倒升；恒指最多跌五百幾點，最後僅跌百點，成交逼近2,000億銀。身邊戰友瘋狂掟貨，貨源再次落入強者手。都係嗰句，阿爺一日未叫停牛市
，一日派對都未完，趁噪音出現炒上落、貨底繼續揸實嘅策略不變。
下跌股份近千隻，能夠逆流而上，肯定有其個人之處，如果創埋52周新高呢？強中強也！今日推介嘅愛高集團（328），正正係代表之一。
提起愛高，會記得David Webb係股東，但賣點又點止咁少？愛高去年出售塑膠產品業務後，現時主打消費電子產品，周初率先公佈盈喜，受惠營業額上升、毛利率改善及未有一次性撇銷，成功轉虧為盈，大有turnaround之勢。講財政狀況，手頭淨現金達6.4億銀，相當於市值近六成，典型現金牛。點解每股NAV有3.2元咁高嘅？原來手持葵湧、元朗、鰂魚湧多個工廈物業收租，已值3億多元，絕對有力分拆再大搞，有意思！
睇真啲，除Webb持股8%外，大股東梁劍文等家族成員持股超過五成，貨源歸曬邊，要舞上話都冇咁易。加少少想像力，殼股買少見少，呢隻年年派息、市值只得11億元嘅老牌工業股，竟然六折大平賣，肯定成為有心人獵物，唔通因為咁破頂？買少少傍身等大炒，博得過！
唐牛
https://www.facebook.com/tongcow88
唐牛
魚樂無窮 - 唐牛 舊文
