智取大市：市況轉弱 交行照博
上星期三，晉佳喺facebook page交代點解突然轉view，短線睇淡，當日晉佳大手減持股份，就當係為年初到而家嘅升市做一次結算，收割之後再重新上路，見有好機會先再衝過，減持行動唔代表長線睇淡。
細價股要洗牌
突然睇淡嘅原因好簡單，上星期三唔單止大價股
踢唔鬱，連細價股氣氛突然轉弱，市場炒作空間似乎榨乾咗八成，點都要洗一洗牌先有得再玩過，呢種洗牌唔會一兩日跌市搞得掂。
直至噚日為止，港股已經連續5個交易日跌股多過升股，賺錢難度的確增加，雖然急升細價股為數不少，但跌幅榜仍有唔少前排炒起而熟口熟面之輩出現，近日衝細價股，好難全線賺錢，拉勻未必好有肉食。
另外，近排細價股經常大折讓配股，然後照樣超裂口高開，玩到太癲，晉佳恐防即將嚟一次細價股冚檔。
至於內地A股市況都轉弱，雖然噚日滬綜指破頂升2%，但係深成指竟然下跌1.1%，深圳嘅創業板指亦跌4.7%，連滬深市場都出現背馳，原因係內地細價股散水，同時資金流入去龍尾內銀股，同埋內地券商股。
由於內銀股集中喺上海A股上市，所以升勢傾斜喺滬綜指之上；深成指內銀股比重偏低，所以跑輸滬綜指。
噚日中行、交行A股升停板，建行A股都能夠升成7%。除咗傳出中行（3988）、浦發銀行等等喺上海自貿區對境外發行同業存單之外，亦傳出交行（3328）引入騰訊（700）同復星集團，股價升8%破頂，內銀之中最強。
飲混改頭啖湯
交行係首家進行混合所有制改革嘅內銀，相比其他內銀已有優勢，而佢嘅每股淨資產6.6元人民幣，相當於每股8.24港元，市賬率1倍左右，有改革黃袍加身之下，估值仍然相比其他內銀股為低，就已經有條件繼續爆上。
內銀股市值大、交投活躍，亦係A股ETF重倉股份，所以A、H差價難以擘到好闊，交行A、H股之後幾乎要面貼面咁升。
交行H股升到去市賬率1.2倍，估值先至略高過其他內銀股，咁先合理，即係目標價睇9.9元，難度唔高，即使市況轉差，都仲博得過。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
