中環在線：李國寶抱孖孫仔
■李民橋（左）喜獲孖胎囝囝，又有孫抱嘅李國寶當然高興。 設計對白
老人家最高興就係抱孫，越多越開心。東亞銀行（023）主席李國寶上星期又抱孫喇，長子李民橋（Adrian）與嬌妻鄺保瑜（Bonnie）生咗一對男孖B，恭喜曬。
Adrian與前妻羅寶盈本身育有一
女李德賢（Adrinne），2011年與Bonnie結婚後，今次再添兩名寶貝仔，佢當然非常開心，至於孖仔名字，佢話暫時保密。
■鄺保瑜創辦網上嬰幼兒禮品店無耐就誕下孖B。 資料圖片 名字料按族譜用「光」字
佢太太Bonnie過去大半年都幾多喜事，舊年9月先至創業，創辦網上嬰幼兒禮品店Babylicious，轉眼孖B上星期出世，應該有排忙。
講番BB名字，雖然Adrian賣關子，但李家係本港望族，改名應該依照李家族譜排序。Adrian兩位公子，好大機會參照「光．宗．耀．祖」嘅起名祖訓，跟細佬李民斌（Brian）嘅兩位公子──李光恒與李光晉一樣，同以「光」字起名。
再過3年就到百周年嘅東亞，由李國寶祖父李作元（又名李冠春），於上世紀初，同簡東浦、馮秉芬等城中名流攜手創立，以李作元呢輩計起，到Adrian及Brian兩兄弟先後加入東亞，已經係家族中第四代賓架成員。
根據《李家皇朝》一書所載，從李作元起及以下共四代，家族成員以「作．福．國．民」起名，跟住下四代就用「光．宗．耀．祖」，延續李家百載傳奇。東亞員工當然最想知，寶哥哥會否仿效恒地（012）主席李兆基派大利是喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
