金手指：中港照相博賣殼
■孫道弘任副主席的中港照相，昨日股價大升25.9%。 資料圖片
有間公司一路喺孫柏文觀察名單上，就係中港照相（1123）。由古至今，食物由宰割到被食落肚，有好大百分比會被浪費，其中減低浪費最重要發現，就係將食物冷凍。第一代就係冬天去已結冰嘅湖，切冰擺地牢。第二代
，就係用船從北冰洋拖啲冰山去熱帶地區。第三代，就係雪廠製雪。第四代，就係而家啲屋企雪櫃。
望大股東光榮引退
冷凍食物需求一路冇變，只係每一代成本、穩定性，以十倍效率咁升。但唔好話橫跨四代，歷史中係冇一間企業可以由一代跳到下一代。啲企業捱唔住科技嘅洪流，但知得早嘅商人，知做緊嘅業務冇得做，可以光榮引退，而唔係死頂。因我相信最後嗰間由北極運冰山嘅公司一定係最有效率的。不過管理得幾好，人哋一間水皮冰廠就做瓜你。
中港照相本行就係曬相、膠卷、相紙，解決人類捕捉影像同發放嘅需要。佢嘅科技一定比畫家畫平及準百倍。但一個instagram加數碼相機，又將成本推低，中港照相賣嘅嘢，玩完。佢哋當然諗方法轉型。幾年前開始賣護膚品，又開電器零售點。生意額雖大升，但上周就要發盈警。始終賣護膚品同電器根本唔係佢專長。
噚日佢股價大升，我就打電話畀老炒家朋友問。佢話中港照相多年來睇派息，都知總裁孫道弘同佢阿爸孫大倫主席對小股東好。想對小股東繼續好係應該光榮引退。如用拆骨加殼價，最少值1.3元一股，比噚日大升後收0.68元高，噚日咁升係賣盤春江鴨活動。
老炒家話old money關心嘅係reputation。問我：「孫大倫話如光榮引退賣殼你會點寫佢？」我話：「當然大讚保護小股東利益啦！最好就係賣畀馬雲改名阿里照相，同instagram撼啦！」老炒家聽到都大笑，原來買咗呢隻好多年，就係望大股東會醒悟。資本世界有智慧咁引退就最能贏得掌聲。孫大倫同孫道弘都有智慧，所以博賣殼，不問價追中港照相！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
