中環在線：
黎大鈞Goodbye「KISS」！
■黎大鈞臨別數碼通，都要親自主持「KISS」呢件大製作。
一向寸嘴嘅數碼通（315）總裁黎大鈞，8月底就會離開公司，呢段時間佢都冇hea住做，臨走前仲留下大作，下星期親自主持「KISS」發佈會，形象硬朗嘅黎總諗到用KISS做主題，唔通
諗住同大家Kiss Goodbye，同各位傳媒朋友正式吻別？
據聞黎大鈞好想為呢個發佈會保持神秘感，不過近日市場上已經越嚟越多傳聞，率先踢爆發佈會將會公佈數碼通進軍手機支付市場，同埋推出網購平台，所以請柬上寫住「為零售重新定義（Retail Redefined）」。
雖然「小小超」李澤楷旗下香港電訊（6823）早幾日已經搶頭啖湯，搶先推出「拍住賞」手機支付服務，董事總經理艾維朗喺發佈會當日，仲不斷強調，要為「金錢（Money）」、「便利（Convenience）」重新定義，牌面睇，黎大鈞就輸咗個馬鼻嘞。
可支援iPhone
不過有傳數碼通今次嘅支付技術較香港電訊更優勝，會用自家研發嘅超聲波對接買賣雙方裝置，所以iPhone與Android兩大手機都支援得到，唔似香港電訊嘅NFC技術，暫時只係可以支援Android手機。
新服務仲會同母公司新鴻基地產（016）旗下商場合作，定位提示服務非常厲害，能夠根據用家當時嘅位置，收到附近嘅優惠通知，連用家經過次數、逗留時間等等都會計算在內，如果成事，對新地商場租戶都有利。
黎大鈞1992年幫手成立數碼通，曾離開過幾年，2001年回巢執掌至今已14年，臨走前炮製呢個好似好正嘅新服務，抵大老闆錫佢咁多年喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
